നോട്ട് അസാധു കാലത്ത്  സായിബാബ ട്രസ്റ്റിന് ലഭിച്ചത് 31.73 കോടി രൂപ 

ഷിര്‍ദി (മഹാരാഷ്ട്ര): നോട്ട് അസാധുവാക്കിയശേഷം 50 ദിവസത്തിനുള്ളില്‍ സായിബാബ സന്‍സ്താന്‍ ട്രസ്റ്റിന് സംഭാവനയായി ലഭിച്ചത് 31.73 കോടി രൂപ. ഇതില്‍ 4.53 കോടിയുടെ 500,1000 അസാധു നോട്ടുകളും 3.80 കോടി പുതിയ 2000, 500 നോട്ടുകളുമുണ്ട്. സംഭാവനപ്പെട്ടികള്‍ വഴി 18.96 കോടി, ഡെബിറ്റ്-ക്രെഡിറ്റ് കാര്‍ഡുകള്‍ വഴി  4.25 കോടി, ബാങ്ക് ഡ്രാഫ്റ്റുകള്‍ വഴി 3.96 കോടി എന്നിങ്ങനെയാണ് സംഭാവന ലഭിച്ചത്. വി.ഐ.പി ഭക്തരുടെ ‘ദര്‍ശന്‍’, ‘ആരതി’ എന്നിവ വഴി 3.18 കോടി രൂപയും ഈ കാലയളവില്‍ ലഭിച്ചു. എന്നാല്‍, കഴിഞ്ഞ സാമ്പത്തികവര്‍ഷത്തെ അപേക്ഷിച്ച് പ്രതിദിന ശരാശരി സംഭാവന കുറഞ്ഞതായാണ് കണക്ക്. കഴിഞ്ഞ തവണ ഇത് 44.38 ലക്ഷമായിരുന്നെങ്കില്‍ നോട്ട് അസാധുവിനുശേഷം ഇത് 37.92 ലക്ഷമായി കുറഞ്ഞു.