റായ്പൂർ സന്യാസി സമ്മേളനത്തിൽ ഗാന്ധി ഘാതകൻ ഗോഡ്​സെയെ പുകഴ്ത്തൽ; പ്രതിഷേധം

റായ്പൂർ: ഹരിദ്വാറിലെ സന്യാസി സമ്മേളനത്തിന്​ പിന്നാലെ ഛത്തീസ്​ഗഡിലെ റായ്പൂരിൽ സംഘടിപ്പിച്ച സന്യാസി സമ്മേളന(ധർമ സൻസദ്​)ത്തിലും വിദ്വേഷ പ്രസംഗം. കാളിചരൺ മഹാരാജി​ന്‍റേതായിരുന്നു വിദ്വേഷ പ്രസംഗം.

രാഷ്ട്രപിതാവ്​ മഹാത്മാഗാന്ധിയെ കൊലപ്പെടുത്തിയ നാഥുറാം ഗോഡ്​സെയെ പുകഴ്ത്തിക്കൊണ്ടായിരുന്നു പ്രസംഗം. മഹാത്മാഗാന്ധിയെ അവഹേളിച്ചതിനെതിരെ പരിപാടിയുടെ മുഖ്യനടത്തിപ്പുകാരിലൊരാളായ രാം സുന്ദർ മഹാരാജ്​ രംഗത്തെത്തി. പരാമർശത്തിൽ പ്ര​തിഷേധിച്ച്​ രാം സുന്ദർ മഹാരാജ്​ ​വേദിവിട്ടിറങ്ങുകയും ചെയ്തു. രണ്ടുദിവസമായി നടന്ന സമ്മേളനം ഞായറാഴ്ചയാണ്​ അവസാനിച്ചത്​.

ഹരിദ്വാറിൽ നടന്ന മത​സമ്മേളനം ന്യൂനപക്ഷ സമുദായങ്ങൾക്കെതിരെ വർഗീയവും പ്രകോപനപരവുമായ പ്രസംഗങ്ങളുടെ പേരിൽ വാർത്തകളിൽ നിറഞ്ഞുനിന്നിരുന്നു.

'രാഷ്ട്രീയത്തിലൂടെ രാജ്യം പിടി​ച്ചെടുക്കുകയാണ്​ മുസ്​ലിംകളുടെ ലക്ഷ്യം' -റായ്പൂർ സമ്മേളനത്തിൽ കാളിചരൻ മഹാരാജ്​ പറഞ്ഞു. ഗാന്ധിയെ കൊന്ന നാഥു​റാം ഗോഡ്​സെയെ ഞാൻ സല്യൂട്ട്​ ചെയ്യുന്നുവെന്നും കാളിചരൻ സമ്മേളനത്തിൽ പറഞ്ഞു. പ്രസ്​താവനക്കെതിരെ രാഷ്ട്രീയ നേതാക്കൾ ഉൾപ്പെടെ നിരവധിപേർ രംഗത്തെത്തിയിരുന്നു.