ബാർ ഉദ്​ഘാടനം ചെയ്​തത്​ റസ്​റ്ററൻറാണെന്ന്​ തെറ്റിദ്ധരിപ്പിച്ച്​; ഉടമകൾക്കെതിരെ നടപടി വേണം -സാക്ഷി മഹാരാജ്​

ലക്​നോ: താൻ ഉദ്​ഘാടനം ചെയ്​ത നൈറ്റ്​ ക്ലബ്ബിനെതിരെ നടപടി സ്വീകരിക്കണമെന്നാവശ്യപ്പെട്ട്​ ബി.ജെ.പി എം.പി സാക്ഷി മഹാരാജ്​ പൊലീസിന്​ കത്തയച്ചു. തെറ്റിദ്ധരിപ്പിച്ചാണ്​ തന്നെ നൈറ്റ്​ ക്ലബ്ബ്​ ഉദ്​ഘാടനത്തിന്​ കൊണ്ടുപോയതെന്ന്​ അദ്ദേഹം കത്തിൽ പറയുന്നു. 

ത​​​​െൻറ മണ്ഡലമായ ഉന്നാവോയിലെ അഭിഭാഷകൻ രാജൻ സിങ്​ ചൗഹാൻ ലക്​നോ അലിഗഞ്ചിലെ റസ്​റ്ററൻറ്​ ഉദ്​ഘാടനത്തിനാണെന്ന്​ തെറ്റിദ്ധരിപ്പിച്ച്​​ ​തന്നെ കൂട്ടിക്കൊണ്ടുപോയത്​. റസ്​റ്ററൻറ്​ ഉടമകളായ സുമിത്​ സിങ്ങും അമിത്​ ഗുപ്​തയും ഉദ്​ഘാടനത്തിന്​ താൻ തന്നെ വേണമെന്ന്​ നിർബന്ധം പിടിച്ചതായി രാജൻ സിങ്​ ചൗഹാൻ തന്നോട്​ പറഞ്ഞു. 

ഡൽഹിയിലേക്ക്​ വിമാനം കയറേണ്ട തിരക്കിലായതിനാൽ താൻ  രണ്ട്​- മൂന്ന്​ മിനുട്ടിനുള്ളിൽ റിബ്ബൺ മുറിച്ച്​ ഉദ്​​ഘാടനം നടത്തുകയും ചെയ്​തു. പിന്നീട്​ മാധ്യമങ്ങളിലൂടെയാണ്​ അത്​ റസ്​റ്ററൻറല്ല, നൈറ്റ്​ ക്ലബ്ബാണ്​ എന്ന്​ താനറിഞ്ഞത്​. അത്​ മദ്യശാലയാണെന്നും ചിലർ പറഞ്ഞറിയാൻ കഴിഞ്ഞു. ഇതേതുടർന്ന്​ താൻ റസ്​ററൻറി​​​​െൻറ ലൈസൻസ്​ ആവശ്യപ്പെട്ടപ്പോൾ ഉടമസ്​ഥർ അത്​ കാണിച്ചു തന്നില്ല. അതിനർഥം എല്ലാകാര്യങ്ങളും അവർ ഗൂഢാലോചന നടത്തി നടപ്പാക്കുകയായിരുന്നു.  

ത​​​​െൻറ പവിത്രമായ പ്രതിഛായക്ക്​ കളങ്കം വരുത്തുന്നതായിരുന്നതാണ്​ ഇൗ സംഭവം. റസ്​റ്ററൻറ്​ എന്ന വ്യാജേന നടത്തുന്ന ഇൗ ബാറിനെ കുറിച്ച്​ പൊലീസ്​ അന്വേഷിക്കണം. നിയമപരമായി എന്തെങ്കിലും തെറ്റായ പ്രവർത്തികൾ ഇവിടെ നടന്നിട്ടുണ്ടെങ്കിൽ സ്​ഥാപനം അടച്ചു പൂട്ടണമെന്നും തട്ടിപ്പു​കാർക്കെതിരെ ശക്​തമായ നടപടി സ്വീകരിക്കണമെന്നും സാക്ഷി മഹാരാജ്​ ആവശ്യപ്പെട്ടു.