കർഷകസമരം ആറ്​ മാസം പിന്നിടുന്നു; മെയ്​ 26 ന്​ കരിദിനം ആഹ്വാനം ചെയ്​ത്​ സംയുക്ത കിസാൻ മോർച്ച

ന്യൂഡൽഹി: കേന്ദ്രസർക്കാറി​െൻറ കാർഷിക നിയമങ്ങൾക്കെതിരെ കർഷകർ തുടങ്ങിയ സമരം ആറ്​ മാസം തികയുന്ന മെയ്​ 26 ന്​ സംയുക്ത കിസാൻ മോർച്ച കരിദിനമാചരിക്കാൻ തീരുമാനിച്ചു.

ഓൺലൈൻ വാർത്താസമ്മേളനത്തിലൂടെ കർഷക നേതാവ് ബൽബീർ സിംഗ് രാജേവാളാണിക്കാര്യം അറിയിച്ചത്​. രാജ്യമൊ​ട്ടൊകെ എല്ലാവരും 26 ന് വീടുകളിലും വാഹനങ്ങളിലും കടകളിലും കരിങ്കൊടി ഉയർത്തുകയും പ്രധാനമന്ത്രി നരേന്ദ്ര മോദിയുടെ കോലം കത്തിക്കുകയും വേണം.

മെയ് 26 ന് ഞങ്ങൾ പ്രതിഷേധം തുടങ്ങിയിട്ട്​ ആറുമാസം പൂർത്തിയാകും. ഒപ്പം മോദിസർക്കാർ ഭരണത്തിലെത്തിയിട്ട്​ ഏഴ്​ വർഷം പൂർത്തിയാവുകയും ചെയ്യും. ആ സാഹചര്യത്തിൽ ഈ കരിദിനത്തിന്​ വലിയ പ്രസക്​തിയുണ്ടെന്ന്​ അദ്ദേഹം പറഞ്ഞു.

കേന്ദ്ര കാർഷിക നിയമങ്ങൾക്കെതിരായ 'ദില്ലി ചലോ' മാർച്ച് അതിർത്തിയിലെത്തുന്നത്​ നവംബർ 26 നാണ്​. തിക്രി, സിങ്കു, ഗാസിപൂർ അതിർത്തികളിൽ ആയിരക്കണക്കിന് കർഷകരാണ്​ മോദിസർക്കാറിനെതിരെയുള്ള പ്രതിഷേധത്തിൽ പങ്കുചേർന്നത്​.