ദേശീയത തീവ്രവാദത്തിലെത്തി;  രാജ്യത്ത്​​ അസ്​ഥിരത –ശശി തരൂർ

ന്യൂഡൽഹി: ദേശീയത തീവ്രവാദത്തിലെത്തിയാൽ പിന്നെയുണ്ടാകുന്നത്​ അസ്​ഥിരതയായിരിക്കുമെന്ന മുന്നറിയിപ്പ്​ പുലർന്നതാണ്​ നമ്മുടെ രാജ്യത്തിപ്പോൾ കാണുന്നതെന്ന്​  ശശി തരൂർ എം.പി. ഇൗ അസ്ഥിരതയുടെ അടയാളങ്ങളാണ്​ തനിക്കും സ്വാമി  അഗ്​നിവേശിനുമെതിരെ നടന്ന ആക്രമണമെന്നും അദ്ദേഹം  ചൂണ്ടിക്കാട്ടി. ന്യൂഡൽഹി കോൺ​സ്​റ്റിറ്റ്യൂഷൻസ്​ ക്ലബിൽ ‘ദേശീയത പുനർനിർവചിക്കപ്പെടുന്ന വർത്തമാന ഇന്ത്യ’  വിഷയത്തിൽ ഡൽഹി കെ.എം.സി.സി സംഘടിപ്പിച്ച ശിഹാബ്​ തങ്ങൾ അനുസ്​മരണ പ്രഭാഷണം നടത്തുകയായിരുന്നു തരൂർ. രാജ്യം ഭരിക്കുന്ന സർക്കാർ ദേശീയത പുനർനിർവചിക്കാൻ ശ്രമിക്കുകയാണ്​.

 ‘ഭാരത് മാതാ കീ ജയ് ’എന്നു വിളിക്കാൻ എ​​​െൻറ വിശ്വാസം അനുവദിക്കില്ല എന്നു പറയാൻ ഒരാളെ ഭരണഘടന അനുവദിക്കുന്നുണ്ട്.  എന്നാൽ, ഇപ്പോഴുള്ള ഭരണകൂടം അത്​ പറ്റില്ലെന്നും അങ്ങനെ വിളിച്ചാലേ രാജ്യസ്​നേഹി ആകൂം എന്നും പറയുന്നു. സ്വാതന്ത്ര്യലബ്​ധിക്കുശേഷം 67 വർഷമായി കാത്തുസൂക്ഷിച്ചുപോന്ന ദേശീയത നമ്മുടെ വൈവിധ്യം ഉൾക്കൊള്ളുന്നതായിരുന്നു. അതിനെ പുനർനിർവചിക്കാനുള്ള ശ്രമമാണിപ്പോൾ നടത്തുന്നത്​. നിയമവാഴ്ചയേക്കാൾ ഗുണ്ടായിസവും ആൾക്കൂട്ട ആക്രമണവുമാണ്​ രാജ്യത്ത്​. ഇതു​െകാണ്ടാണ് പശുവായി ജനിക്ക​ുന്നതാണ്​ മുസ്​ലിമായി ജനിക്ക​ുന്നതിനേക്കാൾ സുരക്ഷിതം എന്നു പറഞ്ഞത്. 

ഹിന്ദുരാഷ്​ട്രവാദം രാജ്യത്തി​​​െൻറ മൂല്യങ്ങളോടും ഭരണഘടന​േയാടുമുള്ള അടിസ്ഥാനപരമായ വഞ്ചനയാണെന്ന്​ ശശി തരൂർ അഭിപ്രായപ്പെട്ടു.  ഹിന്ദുരാഷ്​​ട്രവാദക്കാർ വഞ്ചിക്കുന്നത്​ ഹിന്ദുമൂല്യങ്ങളെക്കൂടിയാണ്​. ഹിന്ദുയിസം സഹിഷ്​ണുതയേക്കാൾ സ്വീകാര്യതയുടെ മതമാണെന്ന്​ തരൂർ പറഞ്ഞു. നൂറ്റാണ്ടുകളായുള്ള ഇൗ പാരമ്പര്യത്തെ നിരാകരിക്കുന്ന നിലപാടാണ്​ ഹിന്ദുരാഷ്​ട്രവാദികളുടേത്​. ഈ സങ്കുചിതമനസ്സിനെ ചെറുക്കണമെന്നും തരൂർ ആവശ്യപ്പെട്ടു. 

മുതിർന്ന കോൺഗ്രസ്​ നേതാവ്​ എ.കെ. ആൻറണി സമ്മേളനം ഉദ്​ഘാടനം ചെയ്​തു. തങ്ങൾകുടുംബവുമായി തനിക്കുണ്ടായിരുന്നത്​ സാധാരണ ബന്ധമല്ലെന്നും രാജ്യത്തി​​​െൻറ ചരിത്രത്തിലാദ്യമായി കേരളത്തിൽ ജനാധിപത്യ മുന്നണി പരീക്ഷണത്തി​​​െൻറ കാലം​െതാട്ട്​ തുടങ്ങിയതാണ്​ അതെന്നും ആൻറണി അഭിപ്രായപ്പെട്ടു. മുസ്​ലിം സമുദായത്തി​​​െൻറ വിദ്യാഭ്യാസ പിന്നാക്കാവസ്ഥ മാറ്റാൻ പ്രധാന പങ്കുവഹിച്ചത്​ സി.എച്ചും ശിഹാബ് തങ്ങളുമാണെന്നും ആൻറണി പറഞ്ഞു. പാണക്കാട്​​ സാദിഖലി ശിഹാബ്​ തങ്ങൾ അധ്യക്ഷത വഹിച്ചു. എം.പിമാരായ കെ.വി. തോമസ്​, ബിനോയ്​ വിശ്വം, കെ.സി. വേണുഗോപാൽ, എം.ബി. രാജേഷ്​,  പി.​െക. കുഞ്ഞാലിക്കുട്ടി എന്നിവർ സംസാരിച്ചു. ഡൽഹി കെ.എം.സി.സി പ്രസിഡൻറ്​ അഡ്വ. ഹാരിസ്​ ബീരാൻ സ്വാഗതവും ജന.  സെക്രട്ടറി മുഹമ്മദ്​ ഹലീം നന്ദിയും പറഞ്ഞു.