റോഹിങ്ക്യകളെ ഇപ്പോൾ നാടുകടത്തരുത്​ -സുപ്രീംകോടതി

ന്യൂഡൽഹി: റോഹിങ്ക്യകളെ ഇപ്പോൾ നാടുകടത്തരുതെന്ന്​ സുപ്രീംകോടതി കേന്ദ്രസർക്കാറിന്​ വാക്കാൽ നിർദേശം നൽകി. അഭയാർഥികളെ നാടുകടത്തുന്നതിനെതിരെ സമർപ്പിച്ച ഹരജി പരിഗണി​ക്കുന്നത്​ നവംബർ 21ലേക്ക്​ മാറ്റിയ ചീഫ്​ ജസ്​റ്റിസ്​ ദീപക്​ മിശ്ര അധ്യക്ഷനായ ബെഞ്ച്​, ഇതിനിടയിൽ ആകസ്​മികമായി വല്ലതുമുണ്ടായാൽ സുപ്രീംകോടതിയെ സമീപി​ക്കാവുന്നതാണെന്ന്​ റോഹിങ്ക്യകളെ അറിയിച്ചു. 

നിലനിൽക്കുന്നത്​ അസാധാരണമായ സ്​ഥിതിവിശേഷമാണെന്ന്​ സുപ്രീംകോടതി തുടർന്നു. മനുഷ്യാവകാശങ്ങളുടെ, പ്രത്യേകിച്ചും സ്​ത്രീകളുടെയും കുട്ടികളുടെയും രോഗം ബാധിച്ചവരുടെയും നിരപരാധികളുടെയും അവകാശങ്ങളുടെ സംരക്ഷകനാണ്​ ഭരണഘടനയെന്ന്​ ചീഫ്​ ജസ്​റ്റിസ്​ ഒാർമിപ്പിച്ചു. എന്താണ്​ സംഭവിച്ചുകൊണ്ടിരിക്കുന്നത്​ എന്നറിയാത്ത റോഹിങ്ക്യൻ സ്​ത്രീകളെയും കുട്ടികളെയുമാണ്​ നിരപരാധികൾ എന്നതുകൊണ്ട്​ കോടതി ഉദ്ദേശിക്കുന്നത്​.

ഭരണഘടനകോടതി എന്ന നിലക്ക്​ തങ്ങൾക്ക്​ ഇക്കാര്യത്തിൽ പരിസരബോധമില്ലാത്തവരാകാൻ പറ്റില്ല. ഭരണകൂടത്തിനും പരിസരബോധമില്ലാത്തവരാകാനാവില്ല. കേന്ദ്രസർക്കാറി​​െൻറ സമീപനം ബഹുമുഖമായിരിക്കണം. ദേശീയസുരക്ഷ​, സാമ്പത്തിക^തൊഴിൽ താൽപര്യങ്ങൾ എന്നീ ആശങ്കകൾക്കൊപ്പം മനുഷ്യത്വപരമായ മാനവും പരിഗണിക്കണം. ഇവക്കിടയിൽ സന്തുലനം വേണം.

തെറ്റായി വല്ലതും കണ്ടാൽ കേന്ദ്രസർക്കാറിന്​ നടപടിയെടുക്കാമെന്നും എന്നാൽ, ഇപ്പോൾ അവരെ നാടുകടത്താനാവില്ല എന്നും കേന്ദ്ര സർക്കാറിനുവേണ്ടി ഹാജരായ അഡീഷനൽ സോളിസിറ്റർ ജനറൽ തുഷാർ മേത്തയോട് ചീഫ്​ ജസ്​റ്റിസ്​ ദീപക്​ മിശ്ര പറഞ്ഞ​ു. എന്തെങ്കിലും പ്രയാസങ്ങൾ റോഹിങ്ക്യകൾക്കുണ്ടായാൽ തങ്ങൾ വീണ്ടും സുപ്രീംകോടതിയിൽ വരുമെന്ന്​ അഭയാർഥികൾക്കുവേണ്ടി ഹാജരായ പ്രമുഖ നിയമജ്​ഞൻ ഫാലി എസ്​ നരിമാൻ പറഞ്ഞപ്പോൾ ക്ഷുഭിതനായ കേന്ദ്രസർക്കാറി​​െൻറ അഭിഭാഷകൻ എന്ത്​ ചെയ്യണമെന്ന്​ തങ്ങൾക്കറിയാമെന്നും കോടതി ഇപ്പോൾ വല്ലതും പറഞ്ഞാൽ അതിന്​ അന്തർദേശീയതലത്തിൽ പ്രത്യാഘാതങ്ങളുണ്ടാകുമെന്നും മുന്നറിയിപ്പ്​ നൽകി.

എന്നാൽ, അഭയാർഥികൾക്ക്​ ഇതിനിടയിൽ സുപ്രീംകോടതിയിൽ വരേണ്ടിവരുന്ന തരത്തിൽ ആകസ്​മികമായൊന്നും ഉണ്ടാകുകയില്ലെന്ന്​ കേന്ദ്രസർക്കാർ ഉറപ്പുവരുത്തിയാൽ മതിയെന്ന്​ ചീഫ്​ ജസ്​റ്റിസ്​ ദീപക്​ മിശ്ര വ്യക്​തമാക്കി.