പ്രിൻസിപ്പലും ടീച്ചറും ചേർന്ന സംഘത്തിന്‍റെ​ കുട്ടിക്കടത്ത്​, ഒരു കുട്ടിക്ക്​ വില രണ്ടര ലക്ഷം

കൊൽക്കത്ത: കുട്ടിക്കടത്തുമായി ബന്ധപ്പെട്ട കേസിൽ സ്​കൂൾ പ്രിൻസിപ്പലും അധ്യാപികയും ഇവരുടെ സഹായികളും അറസ്റ്റിൽ. പശ്ചിമ ബംഗാളിലെ ബാൻകുരയിൽനിന്നാണ്​ പ്രിൻസിപ്പലും അധ്യാപികയുമടക്കം പത്തുപേർ അറസ്റ്റിലായത്​. ഇവരിൽനിന്ന്​ പ്രായപൂർത്തിയാവാത്ത അഞ്ചു കുട്ടികളെ രക്ഷിച്ചതായും പൊലീസ്​ അറിയിച്ചു.

എട്ടു മാസം മുതൽ ആറു വയസ്സുവരെയുള്ള കുട്ടികളെയാണ്​ രക്ഷിച്ചത്​. പ്രിൻസിപ്പൽ കമൽ കുമാർ രജോരിയ ആണ്​ അറസ്റ്റിലായത്​. രാജസ്​ഥാനിലെ രജോരിയ സ്വദേശിയായ ഇയാൾ ഈയിടെ ​ ബാൻകുരയിലേക്ക്​ സ്​ഥലം മാറിയെത്തുകയായിരുന്നു​. അധ്യാപികയായ സുഷമ ശർമയാണ്​ ഇയാൾക്കൊപ്പം പിടിയിലായത്​. ഇവരിൽനിന്ന്​ 1.75 ലക്ഷം രൂപ കണ്ടെടുത്തതായി ബാൻകുര പൊലീസ്​ സൂ​പ്രണ്ട്​ ധൃതിമാൻ സർക്കാർ അറിയിച്ചു.

പ്രതികളെ കുടുക്കിയത്​ നാട്ടുകാരുടെ ജാഗ്രത

പ്രദേശവാസികളുടെ അവസരോചിതമായ ഇടപെടലാണ്​ കുട്ടിക്കടത്ത്​ റാക്കറ്റിനെ അറസ്​റ്റ്​ ചെയ്യാൻ സഹായകമായതെന്ന്​ പൊലീസ്​ പറഞ്ഞു. രജോരിയയുടെയും സുഷമ ശർമയുടെയും നേതൃത്വത്തിൽ മൂന്നു കുട്ടികളെ ഒരു വാഹനത്തിലേക്ക്​ ബലമായി തള്ളിക്കയറ്റുന്നത്​ നാട്ടുകാരിൽ ചിലരുടെ ശ്രദ്ധയിൽ പെടുകയായിരുന്നു. കുട്ടികൾ സമ്മതമില്ലാതെ കരയുന്നതു കണ്ടാണ്​ നാട്ടുകാർ ഇടപെട്ടത്​. അവർ പ്രിൻസിപ്പലിനെ ചോദ്യം ചെയ്​തതോടെ പരസ്​പര വിരുദ്ധമായിരുന്നു മറുപടി. പിടിക്കപ്പെടുമെന്നായപ്പോൾ ഓടി രക്ഷപ്പെടാനായി ശ്രമം. നാട്ടുകാർ പിന്നാലെ ഓടി ഇയാളെ പിടികൂടുകയായിരുന്നുവെന്ന്​ ഹിന്ദുസ്​ഥാൻ ടൈംസ്​ റി​േപ്പാർട്ട്​ ചെയ്​തു. പിന്നീട്​ ഇയാ​െള പൊലീസിന്​ കൈമാറി.

അന്വേഷണം പ്രാഥമിക ഘട്ടത്തിലാണെന്നും കൂടുതൽ വിവരങ്ങൾ ഇപ്പോൾ വെളിപ്പെടുത്താനാകില്ലെന്നു​ം പൊലീസ്​ സൂപ്രണ്ട്​ പറഞ്ഞു. ഇതൊരു അന്തർ ജില്ലാ സംഘമോ അന്തർ സംസ്​ഥാന സംഘമോ ആകാനാണ്​ സാധ്യതയെന്നും അദ്ദേഹം കൂട്ടിച്ചേർത്തു. സംഘത്തിന്‍റെ പിടിയിൽനിന്ന്​ രക്ഷിച്ച അഞ്ചു കുട്ടികൾ അസൻസോൾ, ദുർഗാപുർ എന്നിവിടങ്ങളിൽനിന്നുള്ളവരാണെന്നാണ്​ പൊലീസ്​ നൽകുന്ന സൂചന. ഇവരിൽ മൂന്നുപേർ ലൈംഗിക തൊഴിലാളികളുടെ മക്കളാണെന്ന്​ അന്വേഷണ സംഘത്തിലെ ഒരു പൊലീസുകാരൻ പറഞ്ഞു. ഒരു കുട്ടിയെ ​​കുറ്റാരോപിതനായ പ്രിൻസിപ്പൽ രണ്ടര ലക്ഷം രൂപ കൊടുത്ത്​ വാങ്ങിയതാണെന്നും പൊലീസുകാരനെ ഉദ്ധരിച്ച്​ പത്രം റിപ്പോർട്ട്​ ചെയ്​തു.