മത നിയമപ്രകാരം രണ്ടാം വിവാഹം സാധ്യമായിരിക്കാം; എന്നാലത്​​ ആദ്യ ഭാര്യയോടുള്ള ക്രൂരതയെന്ന്​ കോടതി

ബംഗളൂരു: മുസ്​ലിം മതനിയമ പ്രകാരം രണ്ടാം വിവാഹം കഴിക്കുന്നത്​ തെറ്റല്ലെങ്കിലും അത്​ ആദ്യ ഭാര്യയോട്​ കാണിക്കുന്ന കടുത്ത ക്രൂരതയാണെന്ന്​ കർണാടക ഹൈകോടതി. ഒന്നാം ഭാര്യക്ക്​ വിവാഹമോചനം നടത്താനുള്ള അർഹതയുണ്ടെന്നും കോടതി പറഞ്ഞു. ഭർത്താവ് മറ്റൊരു സ്ത്രീയെ വിവാഹം കഴിച്ചതിന് ശേഷം രാംജാൻബി എന്ന സ്ത്രീ വിവാഹബന്ധം പിരിച്ചുവിടാൻ ആവശ്യപ്പെട്ട കേസ് പരിഗണിക്കുന്നതിനിടെയാണ് ഹൈകോടതി ബെഞ്ച് ഇക്കാര്യം വ്യക്തമാക്കിയത്.

ആദ്യ വിവാഹം പിരിച്ചുവിടുന്നത്​ ന്യായീകരിച്ച വിചാരണക്കോടതി വിധിക്കെതിരെയുള്ള രാംജാൻബിയുടെ ഭർത്താവി​െൻറ അപ്പീൽ ജസ്റ്റിസുമാരായ കൃഷ്ണ എസ് ദീക്ഷിത്, പി കൃഷ്ണ ഭട്ട് എന്നിവരടങ്ങുന്ന ഡിവിഷൻ ബെഞ്ച് അടുത്തിടെ തള്ളിയിരുന്നു. 'നിയമം അനുവദിക്കുന്നതാണെങ്കിലും ചില പ്രവര്‍ത്തികള്‍ എല്ലായ്‌പ്പോഴും നല്ലതാവണമെന്നില്ല, ഉദാഹരണത്തിന് കള്ളുകുടിക്കാനും, പുകവലിക്കാനും, കൂര്‍ക്കം വലിക്കാനുമെല്ലാം നിയമം അനുവദിക്കുന്നുണ്ടല്ലോ പക്ഷേ ഈ പ്രവൃത്തികള്‍ ചില ഘട്ടങ്ങളില്‍ അപകടകരമായി മാറുന്നതും കാണുന്നുണ്ട്', അതുപോലെ, 'ഒരു മുസ്​ലിം രണ്ടാം വിവാഹം കഴിക്കുന്നത്​ ചിലപ്പോൾ നിയപരമായിരിക്കാം.. എന്നാൽ, പലപ്പോഴുമത്​ ആദ്യ ഭാര്യയോടുള്ള​ കടുത്ത ക്രൂരതയാവുന്നു. . -ബെഞ്ച്​ ചൂണ്ടിക്കാട്ടി.

കർണാടകയിലെ വിജയപുര സ്വദേശിയായ യൂസുഫ്​ പാട്ടീൽ ബംഗളൂരുവിലുള്ള രാംജാൻബിയെ 2014ൽ ആണ്​ വിവാഹം കഴിക്കുന്നത്​. വൈകാതെ അയാൾ രണ്ടാം വിവാഹവും കഴിച്ചു. എന്നാൽ, താനുമായുള്ള വിവാഹം പിരിച്ചുവിടണമെന്ന്​ ആവശ്യപ്പെട്ടുകൊണ്ട്​ രാംജാൻബി കീഴ്​കോടതിയിൽ കേസ്​ ഫയൽ ചെയ്​തു. തന്നെയും മാതാപിതാക്കളെയും ഭർത്താവും കുടുംബവും ദേഹോപദ്രവം ഏല്‍പ്പിച്ചതായും അവർ കോടതിയിൽ പറഞ്ഞു.

താൻ ആദ്യ ഭാര്യയെ സ്​നേഹിക്കുന്നുണ്ടെന്നും ശക്​തരും രാഷ്​ട്രീയപരമായി വലിയ സ്വാധീനവുമുള്ള മാതാപിതാക്കളുടെ സമ്മർദ്ദം കാരണമാണ്​ രണ്ടാം വിവാഹത്തിന്​ മുതിർന്നതെന്നും പാട്ടീൽ കോടതിയിൽ പറഞ്ഞു. ശരീഅത്ത്​ നിയമം ഒരു മുസ്​ലിമിന്​ ബഹുഭാര്യത്വം അനുവദിക്കുന്നുണ്ടെന്നും അയാൾ ചൂണ്ടിക്കാട്ടിയിരുന്നു. അതേസമയം, ആദ്യഭാര്യയുടെ സ്വത്തുവകകള്‍ രണ്ടാം ഭാര്യയുമായി പങ്കുവെക്കാന്‍ ഭര്‍ത്താവ് നിര്‍ബന്ധിക്കരുതെന്ന് നേരത്തേ അലഹാബാദ് കോടതി ഉത്തരവിട്ടിരുന്നു.