അതിർത്തിയിൽ സൈനിക നടപടി: ഒാഹരികൾ കൂപ്പുകുത്തി

മുംബൈ: പാക് അധീന കശ്മീരിലെ ഭീകരക്യാമ്പുകളിൽ ഇന്ത്യ ആക്രമണം നടത്തിയെന്ന വാര്‍ത്തകള്‍ പുറത്തുവന്നതിനെ തുടര്‍ന്ന് ഓഹരി സൂചികകള്‍ കുത്തനെ ഇടിഞ്ഞു. രൂപയുടെ മൂല്യവും കൂപ്പുകുത്തി.

രണ്ടു മണിയോടെ സെൻസെക്​സ്​ 542 പോയിൻറ്​ കുറഞ്ഞ്​ 27,750 ൽ എത്തി. നിഫ്​റ്റി 174 പോയിൻറ്​ താഴ്​ന്ന്​ 8,570 ലും എത്തി.
രൂപയുടെ മൂല്യത്തിൽ 46 പൈസ കുറഞ്ഞ്​ ഡോളറിനെതിരായ വിനിമയത്തിൽ 66.91 ആയി.

പാക് അധീന കശ്മീരിലെ ഭീകര ക്യാമ്പുകളില്‍ ഇന്ത്യ മിന്നലാക്രമണം നടത്തിയതായി മിലിട്ടറി ഓപ്പറേഷന്‍ ഡയറക്ടര്‍ ജനറല്‍ രണ്‍ബീര്‍ സിങ് വെളിപ്പെടുത്തിയതോടെയാണ് സൂചികകളിൽ ഇടിവ്​ വന്നത്​.

രാവിലെ 144 പോയിന്റ് നേട്ടത്തോടെയാണ് സെന്‍സെക്‌സ്​ വ്യാപാരം ആരംഭിച്ചത്. 12 മണിയോടെ സൂചികകൾ താഴ്​ന്നു തുടങ്ങി. ഒരു ഘട്ടത്തിൽ സെന്‍സെക്‌സ് 472 പോയന്റ് താഴ്ന്ന് 27,820ലും നിഫ്റ്റി 151 പോയന്റ് ഇടിഞ്ഞ് 8,553ലുമെത്തി.

ബി.എസ്.ഇയില്‍ 432 കമ്പനികളുടെ ഓഹരികള്‍ മാത്രമാണ് നേട്ടത്തിലുള്ളത്. 2090 ഓഹരികള്‍ നഷ്ടത്തിലാണ്​.