'നേരത്തെ പണം നൽകിയവർക്കാണ്​ കുറഞ്ഞ വിലക്ക്​​ വാക്​സിൻ വിൽക്ക​ുന്നത്​' വിശദീകരണവുമായി സിറം ഇൻസ്റ്റിറ്റ്യൂട്ട്

ന്യൂഡൽഹി: നേരത്തെ പണം നൽകിയ രാജ്യങ്ങൾക്കാണ്​ വാക്​സിൻ വിലകുറഞ്ഞ വിലയ്​ക്ക്​ കൊടുക്കുന്നതെന്ന്​ സിറം ഇൻസ്റ്റിറ്റ്യൂട്ട്​. വിദേശ രാജ്യങ്ങ​ളേക്കാൾ കൂടിയ വിലക്ക് കോവിഷീല്‍ഡ്​ വാക്​സിൻ സംസ്ഥാനങ്ങൾക്ക്​ വിൽക്കാൻ തീര​ുമാനിച്ചതിൽ​ പിന്നാലെയാണ്​ വാക്​സിൻ നിർമാതാക്കളായ സിറം ഇൻസ്റ്റിറ്റ്യൂട്ട്​ ഓഫ് ഇന്ത്യ വിശദീകരണവുമായെത്തിയത്.

നിലവിലുള്ള മറ്റു ചികിത്സക്ക്​ ആവശ്യമായി വരുന്ന തുകയെക്കാൾ കുറഞ്ഞ നിരക്കാണ്​ കോവിഡ്​ വാക്​സിന്​ ഈടാക്കുന്നത്​. മുൻകൂർ പണം നൽകുന്നതിനാൽ പ്രാരംഭ വിലയിൽ കുറവുണ്ടാകും. എന്നാൽ ആവശ്യകത കൂടുന്നതിനനുസരിച്ച്​ ഉൽപാദനം വർദ്ധിപ്പിക്കാൻ നിക്ഷേപം വർദ്ധിപ്പി​ക്കേണ്ടി വരുമെന്ന്​ സിറം മേധാവി അദര്‍ പൂനവാല വിശദീകരണകുറിപ്പിൽ വ്യക്തമാക്കി.

വാക്‌സിനുകളുടെ ആഗോള വില ഇന്ത്യയിലെ വിലയുമായി താരതമ്യം ചെയ്യുന്നത്​ തുല്യതയല്ല. വിപണിയില്‍ താങ്ങാവുന്ന കോവിഡ് വാക്‌സിന്‍ കോവിഷീല്‍ഡിന്​ നിശ്ചയിച്ചിരിക്കുന്നതെന്നും സിറം അധികൃതർ വാർത്താകുറിപ്പിൽ വ്യക്​തമാക്കി.