രാഹുലിന്‍റെ പദയാത്രക്ക്​ പിന്നാലെ ബി.ജെ.പിയുടെ ജൻവിശ്വാസ്​ യാത്ര; ജനസേവനമാണ്​ യഥാർഥ രാമരാജ്യമെന്ന്​ യോഗി

മഥുര: ഉത്തർപ്രദേശിൽ നിയമസഭ തെരഞ്ഞെടുപ്പ്​ ഒരുക്കങ്ങൾക്ക്​ മുന്നോടിയായി ജൻ വിശ്വാസ്​ യാത്ര സംഘടിപ്പിച്ച്​ ബി.ജെ.പി. പ്രതിപക്ഷത്തെ കടന്നാക്രമിച്ചും അഞ്ചുവർഷത്തെ കേന്ദ്ര -സംസ്​ഥാന ഭരണം ഉയർത്തിക്കാട്ടിയാണ്​ പ്രചാരണം. തെരഞ്ഞെടുപ്പ്​ പ്രഖ്യാപനത്തിന്​ മുമ്പ്​ എല്ലാ മണ്ഡലങ്ങളിലും യാത്ര നടത്തും. ​ഞായറാഴ്​ച ആറിടങ്ങളിൽനിന്ന്​ യാത്ര ഫ്ലാഗ്​ ഓഫ്​ ചെയ്​തു.

2017ലെ നിയമസഭ തെരഞ്ഞെടുപ്പിന്​ മുമ്പ്​ ബി.ജെ.പി നൽകിയ വാഗ്​ദാനങ്ങളെല്ലാം പാലിച്ചുവെന്ന്​ മുഖ്യമന്ത്രി യോഗി ആദിത്യനാഥ്​ അവകാശപ്പെട്ടു. ജനങ്ങളോടുള്ള സേവനമാണ്​ യഥാർഥ രാമരാജ്യമായി ഞങ്ങൾ കണക്കാക്കുന്നതെന്നും ആദിത്യനാഥ്​ പറഞ്ഞു.

ബി.ജെ.പിയുടെ ആരെയും പ്രീണിപ്പെടുത്താത്ത നയമാണ്​ കഴിഞ്ഞ നാലര വർഷത്തിലധികമായി എല്ലാ വിഭാഗങ്ങളിലെയും വൻ വികസനത്തിന്​ കാരണമെന്നും ആദിത്യനാഥ്​ കൂട്ടിച്ചേർത്തു. മഥുരയിൽ ജൻ വിശ്വാസ്​ യാത്ര ഫ്ലാഗ്​ ഓഫ്​ ചെയ്യുന്നതിന്​ മുന്നോടിയായി സംസാരിക്കുകയായിരുന്നു മുഖ്യമന്ത്രി.

'പാവങ്ങൾക്ക്​ സൗജന്യ ഭവനം, ടോയ്​ലറ്റ്​, അഞ്ചുലക്ഷം വരെ ഇൻഷുറൻസ്​ തുടങ്ങിയവ നൽകുന്നതാണ്​ യഥാർഥ രാമരാജ്യം' -ആദിത്യനാഥ്​ പറഞ്ഞു.

ജമ്മു കശ്​മീരിലെ ആർട്ടിക്കിൾ 370 റദ്ദാക്കിയതിലൂടെ പ്രധാനമന്ത്രി നരേന്ദ്രമോദിയും​ കേന്ദ്ര ആഭ്യന്തരമന്ത്രി അമിത്​ ഷായും ഡോ. ശ്യമപ്രസാദ്​ മുഖർജിയുടെ ​ഒരു രാജ്യം, ഒരു പതാക, ഒരു ഭരണഘടന എന്ന സ്വപ്​നം യാഥാർഥ്യമാക്കിയെന്നും ആദിത്യനാഥ്​ കൂട്ടിച്ചേർത്തു.

അതേസമയം, കോൺഗ്രസ്​ നേതാക്കളായ പ്രിയങ്ക ഗാന്ധിയും രാഹുൽ ഗാന്ധിയും സംസ്​ഥാനത്ത്​ തമ്പടിക്കുന്നുണ്ട്. കഴിഞ്ഞദിവസം രാഹുൽ ഗാന്ധിയ​ുടെ നേതൃത്വത്തിൽ അമേത്തിയിൽ പദയാത്ര ആരംഭിച്ചിരുന്നു. കേന്ദ്ര സംസ്​ഥാന സർക്കാറുകളുടെ ജനവിരുദ്ധ നയങ്ങൾ ഉയർത്തിക്കാട്ടിയാണ്​ യാത്ര. സമാജ്​വാദി നേതാവ്​ അഖിലേഷ്​ യാദവും തെരഞ്ഞെടുപ്പ്​ കളത്തിൽ സജീവമായി രംഗത്തുണ്ട്​.