വീട്ടമ്മമാർക്ക്​ മാസശമ്പളം; കങ്കണയും ശശി തരൂരും തമ്മിൽ ട്വിറ്റർ യുദ്ധം

ന്യൂഡൽഹി: തമിഴ്​നാട്ടിൽ അധികാരത്തിലെത്തിയാൽ വീട്ടമ്മമാർക്ക്​ മാസശമ്പളം നൽകുമെന്ന മക്കൾ നീതി മയ്യം നേതാവും നടനുമായ കമൽ ഹാസന്‍റെ പ്രസ്​താവനയെ ചൊല്ലിയുള്ള വാക്​പോര്​ രൂക്ഷമാകുന്നു. കോൺഗ്രസ്​ നേതാവ്​ ശശി തരൂർ കമലിനെ അനുകൂലിച്ചാണ്​ രംഗ​ത്തെത്തിയതെങ്കിൽ ബോളിവുഡ്​ താരം കങ്കണ റണാവത്ത്​ പ്രസ്​താവനയെ എതിർക്കുകയായിരുന്നു. ശശി തരൂരിന്‍റെ പ്രസ്​താവനക്കെതിരെ ദൈവത്തിന്‍റെ സൃഷ്​ടിയായ വീടിന്‍റെ നാഥയെ വെറ​ുമൊരു ജീവനക്കാരി മാത്രമായി തരംതാഴ്ത്തുകയാണെ വാദവുമായാണ്​ കങ്കണ രംഗത്തെത്തിയത്​. എന്നാൽ കങ്കണക്ക്​ മറുപടിയുമായി എത്തിയിരിക്കുകയാണ്​ ശശി തരൂർ ഇപ്പോൾ.

വീട്ടമ്മയുടെ ജീവിതത്തിൽ വിലമതിക്കാനാകാത്ത നിരവധി കാര്യങ്ങളുണ്ടെന്ന കങ്കണയുടെ വാദം താൻ അംഗീകരിക്കുന്നുവെന്നും ഇത്​ ശമ്പളമില്ലാത്ത ജോലിയുടെ ​മൂല്യം തിരിച്ചറിയുന്നതിന്​ വേണ്ടിയാണെന്നും എല്ലാ സ്​ത്രീകൾക്കും അടിസ്​ഥാന ശമ്പളം ഉറപ്പുവരുത്തുന്നതിനാണെന്നും അദ്ദേഹം പറഞ്ഞു.

'വീട്ടമ്മയുടെ ജീവിതത്തിൽ വിലമതിക്കാനാകാത്ത നിരവധി കാര്യങ്ങളുണ്ടെന്ന കങ്കണയുടെ വാദത്തെ അംഗീകരിക്കുന്നു. എന്നാൽ, ഇത്​ അക്കാര്യങ്ങളെക്കുറിച്ചല്ല. ഇത്​ ശമ്പളമില്ലാത്ത ജോലിയുടെ മൂല്യം തിരിച്ചറിയുന്നതിന്​ വേണ്ടിയാണ്​. എല്ലാ സ്​ത്രീകൾക്കും അടിസ്​ഥാന ശമ്പളം ഉറപ്പുവരുത്തുകയും ചെയ്യണം. എല്ലാ ഇന്ത്യൻ സ്​ത്രീകളും നിങ്ങളെപ്പോലെ ശാക്തീകരിക്കപ്പെടണമെന്ന്​ ഞാൻ ആഗ്രഹിക്കുന്നു' -ശശി തരൂർ ട്വിറ്ററിൽ കുറിച്ചു.

തമിഴ്​നാട്ടിൽ അധികാരത്തിലെത്തിയാൽ വീട്ടമ്മമാർക്ക്​ മാസ ശമ്പളം നൽകുമെന്ന പ്രസ്​താവനയുമായി ഡിസംബർ 21നാണ്​ കമൽ ഹാസൻ രംഗത്തെത്തിയത്​. പിന്നീട്​ കമൽ ഹാസന്‍റെ പ്രസ്​താവനയെ പിന്തുണച്ചും ​വീട്ടമ്മമാർക്ക്​ പ്രതിമാസ വേതനം നൽകുന്ന പദ്ധതിയെ സ്വാഗതം ചെയ്​തും ശശി തരൂർ രംഗ​ത്തെത്തുകയായിരുന്നു. ശശി തരൂരിന്‍റെ ട്വീറ്റ്​ ഷെയർ ചെയ്​തായിരുന്നു കങ്കണയുടെ പ്രതികരണം.

'പ്രണയത്തിന്‍റെ ഭാഗമായ ഞങ്ങളുടെ ലൈംഗികതക്ക്​ വിലപേശരുത്​. ഞങ്ങളുടെ കുഞ്ഞുങ്ങളെ നോക്കുന്നതിൽ വിലയിടരുത്​. ഞങ്ങളുടെ ചെറിയ രാജ്യത്ത്​ രാജ്ഞിമാരായി കഴിയാനുള്ള ഞങ്ങളുടെ അവകാശത്തിന്​ നിങ്ങൾ വില നിശ്ചയിക്കരുത്​. എല്ലാം വെറും വ്യാപാരമായി മാത്രം കാണരുത്​. പൂർണമായി നിങ്ങളുടെ പ്രണയിനിക്ക്​ കീഴടങ്ങുക. അവൾക്ക്​​ നിങ്ങളുടെ എല്ലാം ആവശ്യമാണ്​. സ്​​േനഹവും ബഹുമാനവും ശമ്പളവും മാത്രമല്ല' -എന്നായിരുന്നു കങ്കണ ട്വീറ്റ്​ .