അഴുക്കുചാൽ വൃത്തിയാക്കാത്ത കരാറുകാരന്‍റെ ദേഹത്ത്​ മാലിന്യമിട്ട്​ ശിവസേന എം.എൽ.എയും അനുയായികളും -വിഡിയോ

മുംബൈ: മഹാരാഷ്​ട്രയിൽ അഴുക്കുചാൽ വൃത്തിയാക്കാത്ത കരാറുകാരന്‍റെ തലയിലും​ ദേഹത്തും മാലിന്യമിട്ട്​ ശിവസേന എം.എൽ.എയും അനുയായികളും. ശിവസേന എം.എൽ.എ ദിലീപ്​ ലാൻഡെയും അനുയായികളുമാണ്​ അതിക്രമത്തിന്​ പിന്നിൽ.

മലിനജലത്തിൽ ഇരുത്തി തലയിലും ദേഹത്തും മാലിന്യം ഇടുന്നത്​ പുറത്തുവന്ന വിഡിയോയിൽ കാണാം. അഴുക്കുചാലിൽ കെട്ടിക്കിടന്ന മാലിന്യം മഴ പെയ്​തതോടെ റോഡിലേക്ക്​ ഒഴുകിയെത്തുകയായിരുന്നു. ഇതിൽ പ്രതിഷേധവും രൂക്ഷമായിരുന്നു. ഇതിൽ ജനങ്ങളുടെ ബുദ്ധിമുട്ട്​ അറിയിക്കാനാണ്​ ഇത്തരമൊരു പ്രവൃത്തിയെന്നായിരുന്നു ശിവ​േസന പ്രവർത്തകരുടെ പ്രതികരണം.

ചാന്ദിവാലി നിയമസഭ മണ്ഡലത്തെ പ്രതിനീധികരിക്കുന്ന വ്യക്തിയാണ്​ ദിലീപ്​ ലാൻഡെ. ജോലി കൃത്യമായി ചെയ്യാത്തതിനാലാണ്​ ഇത്തരമൊരു പ്രവൃത്തിയെന്നായിരുന്നു എം.എൽ.എയുടെ പ്രതികരണം.

കഴ​ിഞ്ഞ 15 ദിവസമായി ഞാൻ ​കരാറുകാരനെ വിളിച്ചു. റോഡിൽനിന്ന്​ മാലിന്യം നീക്കാനും ആവശ്യപ്പെട്ടിരുന്നു. എന്നിട്ടും അദ്ദേഹം അത്​ ചെയ്​തില്ല. ശിവ​േസന പ്രവർത്തകർ പിന്നീട്​ റോഡ്​ വൃത്തിയാക്കാൻ ഇറങ്ങി. ഇതോടെ കോൺട്രാക്ടർ അവിടേക്കെത്തുകയായിരുന്നു. ഇത്​ അദ്ദേഹത്തിന്‍റെ ​േജാലിയാണെന്നും അദ്ദേഹം തന്നെ ചെയ്യണമെന്നും അറിയിച്ചു -എം.എൽ.എ പറഞ്ഞു.

ശനിയാഴ്ചയാണ്​ കോൺട്രാക്​ടർക്കെതിരായ ആക്രമണം. പിന്നീട്​ സമൂഹമാധ്യമങ്ങളിൽ സംഭവത്തിന്‍റെ ദൃശ്യങ്ങൾ വൻതോതിൽ പ്രചരിക്കുകയായിരുന്നു. കനത്ത പ്രതിഷേധമാണ്​ എം.എൽ.എക്കും അനുയായികൾക്കുമെതിരെ ഉയരുന്നത്​.

കഴിഞ്ഞ ദിവസങ്ങളിൽ കനത്ത മഴയാണ്​ മുംബൈയിൽ രേഖപ്പെടുത്തികൊണ്ടിരിക്കുന്നത്​. ജൂൺ ഒമ്പതിന്​ തന്നെ മുംബൈയിൽ മൺസൂൺ എത്തിയിരുന്നു. പലയിടങ്ങളിലും വെള്ളക്കെട്ടുകളും ഗതാഗത തടസവുമുണ്ടായി.