ബി.ജെ.പിയുടെ കുതിരക്കച്ചവടത്തി​െൻറ നേരനുഭവങ്ങൾ തുറന്ന്​ പറഞ്ഞ്​ ശിവസേന എം.പിയുടെ കത്ത്​; അന്വേഷണ ഏജൻസികൾ രാഷ്​ട്രീയ യജമാനൻമാർക്ക്​ വേണ്ടി പണിയെടുക്കുന്നുവെന്ന്​

ബി.ജെ.പിയിതര സർക്കാറുകളെ മറിച്ചിടാൻ നടത്തുന്ന കുതിക്കച്ചവടത്തി​െൻറയും വഴങ്ങാത്തവരെ മെരുക്കാൻ കേന്ദ്ര അന്വേഷണ ഏജൻസികളെ ഉപയോഗിക്കുന്നതി​െൻറയും നേരനുഭവങ്ങൾ തുറന്ന്​ പറഞ്ഞ്​ ശിവസേന എം.പി സഞ്​ജയ്​ റാവത്ത്​ രാജ്യസഭ അധ്യക്ഷന്​​ കത്ത്​ നൽകി.

ബി.ജെ.പിയുടെ പ്രലോഭനങ്ങൾക്ക്​ വഴങ്ങാത്തതിന്​ കേന്ദ്ര ഏജൻസികൾ തന്നെയും കുടുംബത്തെയും നിരന്തരം വേട്ടയാടുകയാണെന്ന്​ രാജ്യസഭ അധ്യക്ഷൻ വെങ്കയ്യ നായിഡുവിന്​ നൽകിയ കത്തിൽ അദ്ദേഹം വിശദമാക്കുന്നുണ്ട്​.

മഹാരാഷ്​ട്ര സർക്കാറിനെ മറിച്ചിടുന്നതിന്​ സഹായിക്കണമെന്നാവശ്യപ്പെട്ട്​ ഒരു മാസം മുമ്പ്​ ചിലയാളുകൾ സംഘം തന്നെ സമീപിച്ചിരുന്നുവെന്ന്​ അദ്ദേഹം കത്തിൽ പറയുന്നു. സംസ്​ഥാനത്ത്​ ഭരണപ്രതിസന്ധി സൃഷ്​ടിച്ച്​ ഒരു ഇടക്കാല തെരഞ്ഞെടുപ്പിലേക്ക്​ എത്തിക്കുകയായിരുന്നു സംഘത്തി​െൻറ ആവശ്യം. അവരുടെ ആവശ്യം നിരസിച്ചതോടെ പ്രലോഭനം ഭീഷണിയായി മാറി. 'ഞാൻ അതിന്​ വലിയ വില കൊടുക്കേണ്ടി വരുമെന്ന്​ അവർ പറഞ്ഞു'- സഞ്​ജയ്​ റാവത്ത്​ എഴുതി.

ഒരു മുൻ റെയിൽവെ മന്ത്രിയുടെ അനുഭവം ഉണ്ടാകുമെന്നാണ്​ അവർ പറഞ്ഞത്​. വർഷങ്ങളോളം ജയിലിൽ കിടക്കേണ്ടി വരും. തന്നെ കൂടാതെ മഹാരാഷ്​ട്ര മന്ത്രി സഭയിലുള്ള രണ്ട്​ പേരും മുതിർന്ന മറ്റു രണ്ട്​ നേതാക്കളും അഴിയെണ്ണി വർഷങ്ങളോളം ജയിലിൽ കിടക്കേണ്ടി വരുമെന്നും അവർ ഭീഷണിപ്പെടുത്തി. അങ്ങിനെ ഇടക്കാല തെരഞ്ഞെടുപ്പിലേക്കെത്തിക്കുകയാണ്​ അവരുടെ പദ്ധതി -റാവത്ത്​ കത്തിൽ പറയുന്നു.

തുടർന്ന്​ വന്നത്​ എൻഫോഴ്​സ്​മെൻറ്​ ഡയറക്​ടറേറ്റി​െൻറ ഇടപെടലാണ്​. പതിറ്റാണ്ടുകൾക്ക്​ മുമ്പ്​ താനോ കുടുംബമോ നടത്തിയ ഭൂമി ഇടപാടുകളുമായി ബന്ധപ്പെട്ടവരെയെല്ലാം ഇ.ഡിയും മറ്റു കേ​ന്ദ്ര ഏജൻസികളും സമീപിച്ചിട്ടുണ്ടെന്നും അദ്ദേഹം രാജ്യസഭാധ്യക്ഷന്​ നൽകിയ കത്തിൽ പറയുന്നു. കരാർ തുകയേക്കാൾ കൂടുതൽ പണം താൻ നൽകിയെന്ന്​ സമതിക്കണമെന്നായിരുന്നു ഭൂമി ഇടപാട്​ നടത്തിയവരോട്​ കേന്ദ്ര ഏജൻസികൾ ആവശ്യപ്പെട്ടത്​. ഇല്ലെങ്കിൽ കടുത്ത പ്രത്യാഘാതമുണ്ടാകുമെന്ന്​ ഭീഷണിപ്പെടുത്തുക കൂടി ചെയ്​തതോടെ 28 പേർ ഇതിനകം തെറ്റായി കേന്ദ്ര ഏജൻസികൾക്ക്​ മൊഴി നൽകിയിട്ടുണ്ടെന്നും റാവത്ത്​ വിശദീകരിക്കുന്നു.

2003 ലെ പി.എം.എൽ.എ നിയമം ഉപയോഗിച്ച്​ തന്നെയും മറ്റു ശിവസേന നേതാക്കളെയും ജയിലിലടക്കാനാണ്​ കേന്ദ്രം ശ്രമിക്കുന്നത്​. 2003 ന്​ മുമ്പ്​ നടന്ന ഭൂമിയിടപാടുകളടക്കമാണ്​​ ഇതിനായി കേന്ദ്ര ഏജൻസികൾ കരുക്കളാക്കുന്നതെന്നും റാവത്ത്​ പറയുന്നു.

ബി.ജെ.പിയുമായി ശിവസേന സഖ്യമൊഴിഞ്ഞതിന്​ ശേഷം നേതാക്കൾ ഇത്തരത്തിലുള്ള വേട്ടയാടലുകൾക്ക്​ നിരന്തരം ഇരയാകുന്നുണ്ടെന്ന്​ അദ്ദേഹം ചൂണ്ടികാട്ടി. മഹാരാഷ്​ട്ര സർക്കാറിനെ എങ്ങിനെയും താഴെയിറക്കുകയാണ്​ കേന്ദ്രത്തിലെ ലക്ഷ്യം. ഇത്​ ജനാധിപത്യത്തിനെതിരായ ആക്രമണമാണ്​. സർക്കാറിനെ മറിച്ചിടാൻ സഹായിക്കാത്തതി​െൻറ പ്രത്യാഘാതമാണ്​ താനും കൂടെ നിൽക്കുന്നവരും അനുഭവിക്കുന്ന വേട്ടയാടലുകളെന്നും അദ്ദേഹം കത്തിൽ വ്യക്​തമാക്കി.

'ആദ്യമവർ സോഷ്യലിസ്​റ്റുകളെ തേടിവന്നു, അപ്പോൾ ഞാൻ മിണ്ടിയില്ല, കാരണം ഞാൻ സോഷ്യലിസ്​റ്റായിരുന്നില്ല...' എന്ന്​ തുടങ്ങുന്ന ജർമൻ പുരോഹിത​ൻ മാർട്ടിൻ നീ​മല്ലറി​െൻറ പ്രസിദ്ധമായ കവിത ഉദ്ധരിച്ചുകൊണ്ടാണ്​ റാവത്ത്​ കത്ത്​ അവസാനിപ്പിക്കുന്നത്​.