കോവിഡ്: രാജ്യത്തെ 'ആർ-വാല്യു' ഒന്നിന് മുകളിലേക്ക്; മൂന്നാം തരംഗത്തിന്റെ അടയാളമോ?
text_fieldsന്യൂഡൽഹി: രാജ്യത്തെ കോവിഡ് 'ആർ-വാല്യു' ഒന്നിന് മുകളിലേക്ക് ഉയരുന്നതിൽ ആശങ്ക. വൈറസിന്റെ വ്യാപനം മനസിലാക്കാനുള്ള സൂചകമാണ് ആർ-വാല്യു (ആർ-ഫാക്ടർ). ഒരാളിൽ നിന്ന് എത്രപേരിലേക്കാണ് അസുഖം പകരുന്നത് എന്നാണ് ആർ-വാല്യു സൂചിപ്പിക്കുന്നത്. മേയ് ഏഴിന് ശേഷം ഒന്നിന് താഴേക്ക് പോയ ആർ-വാല്യു ജൂലൈ 27ന് ഒന്നിന് മുകളിലെത്തിയിരുന്നു. ആർ-വാല്യു കൂടുന്നത് വൈറസിന്റെ വ്യാപനം വർധിക്കുന്നതിന്റെ ലക്ഷണമാണ്.
രണ്ടാം തരംഗ വ്യാപനം കുറഞ്ഞ ശേഷം ആദ്യമായാണ് ജൂലൈ 27ന് ആർ-വാല്യു ഒന്നിലെത്തിയതെന്ന് ചെന്നൈ ഇൻസ്റ്റിറ്റ്യൂട്ട് ഓഫ് മാത്തമാറ്റിക്കൽ സയൻസസിലെ കംപ്യൂട്ടേഷനൽ ബയോളജി പ്രഫസർ സിതാഭ്ര സിൻഹ പറയുന്നു. ജൂലൈ 27 മുതൽ 31 വരെയുള്ള ദിവസങ്ങളിലെ ആർ-വാല്യു 1.03 ആണെന്നാണ് കണക്കാക്കിയതെന്നും അദ്ദേഹം പറഞ്ഞു.
ആർ-വാല്യു ഒന്നിലെത്തിയതായി കേന്ദ്ര ആരോഗ്യ മന്ത്രാലയത്തിലെ ഉദ്യോഗസ്ഥരും വ്യക്തമാക്കിയെന്ന് ഇന്ത്യ ടുഡെ റിപ്പോർട്ട് ചെയ്തു.
ആർ-വാല്യു കുറയുന്നത് രോഗവ്യാപനം ശമിക്കുന്നതിന്റെ അടയാളമാണ്. ഒരാളിൽ നിന്ന് കുറഞ്ഞത് മറ്റൊരാൾക്കെങ്കിലും രോഗം പകരുമ്പോഴാണ് ആർ-വാല്യു ഒന്ന് ആകുന്നത്. ഈ ഘട്ടത്തിൽ രോഗവ്യാപനം കുറയാതെ തുടരുന്നു.
ആർ-വാല്യു ഉയരുന്നതിൽ കഴിഞ്ഞ ദിവസം എയിംസ് മേധാവി ഡോ. രൺദീപ് ഗുലേറിയ ആശങ്ക രേഖപ്പെടുത്തിയിരുന്നു. കോവിഡ് വ്യാപനം കണ്ടുവരുന്ന പ്രദേശങ്ങളിൽ പ്രതിരോധ പ്രവർത്തനം ശക്തമാക്കണമെന്നാണ് അദ്ദേഹം മുന്നറിയിപ്പ് നൽകിയത്.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.