സ്​​മൃ​തി ഇ​റാ​നിക്കും കണ്ണന്താനത്തിനും പ്രധാനവകുപ്പുകൾ നഷ്ടമായി

ന്യൂഡൽഹി: അടുത്തിടെ നടന്ന ദേശീയ ചലച്ചിത്ര അവാർഡുദാന ചടങ്ങ്​ അടക്കം വിവാദമായ പശ്ചാത്തലത്തിൽ വാർത്താവിതരണ പ്രക്ഷേപണ മന്ത്രി സ്​മൃതി ഇറാനിയെ തൽസ്​ഥാനത്തുനിന്ന്​ മാറ്റി പ്രധാനമന്ത്രി നരേന്ദ്ര മോദി അപ്രതീക്ഷിതമായി കേന്ദ്ര മന്ത്രിസഭ അഴിച്ചുപണിതു. വാർത്താവിതരണ പ്രക്ഷേപണ സഹമന്ത്രി രാജ്യവർധൻ സിങ്​​ റാത്തോഡിനാണ്​ പകരം ആ വകുപ്പി​​​​െൻറ സ്വതന്ത്ര ചുമതല.

അതേസമയം, ടെക്​സ്​​െറ്റെൽ മന്ത്രാലയത്തി​​​​െൻറ ചുമതലകൂടി വഹിച്ചിരുന്ന സ്​മൃതി ആ വകുപ്പിൽ തുടരും. ഇത്​ രണ്ടാം തവണയാണ്​ സ്​മൃതിയെ പ്രധാന വകുപ്പിൽനിന്ന്​ മാറ്റുന്നത്​. നേരത്തേ മനുഷ്യ വിഭവശേഷി മന്ത്രാലയത്തി​​​​െൻറ ചുമതലയിൽനിന്ന്​ അവരെ ടെക്​സ്​റ്റൈൽ മന്ത്രാലയത്തിലേക്ക്​ തരംതാഴ്​ത്തിയിരുന്നു. റെയിൽവേ മന്ത്രി പിയൂഷ്​ ഗോയലിന്​ ധനമന്ത്രാലയത്തി​​​​െൻറയും കോർപറേറ്റ്​കാര്യ വകുപ്പി​​​​െൻറയും അധിക ചുമതല താൽക്കാലികമായി നൽകിയിട്ടുണ്ട്​. ധനമന്ത്രി അരുൺ ജെയ്​റ്റ്​ലിക്ക്​ തിങ്കളാഴ്​ച വൃക്ക മാറ്റിവെക്കൽ ശസ്​ത്രക്രിയ വിജയകരമായി നടന്നതിനെ തുടർന്ന്​ വി​ശ്രമം അനിവാര്യമായതിനാലാണ്​ ഗോയലിന്​ ധനമന്ത്രിയുടെ അധിക ചുമതല നൽകിയിരിക്കുന്നത്​.

കുടിവെള്ള-ശുചിത്വ പരിപാലന സഹമന്ത്രി എസ്​.എസ്​. അഹ്​ലുവാലിയയെ തൽസ്​ഥാനത്തുനിന്ന്​ ഒഴിവാക്കി പകരം ഇലക്​ട്രോണിക്​സ്​ ആൻഡ്​ ഇൻഫർമേഷൻ ടെക്​നോളജി വകുപ്പി​​​​െൻറ ചുമതല നൽകി. അൽഫോൻസ്​ കണ്ണന്താനത്തെ ഇലക്​ട്രോണിക്​സ്​ ആൻഡ്​ ഇൻഫർമേഷൻ ടെക്​നോളജി സഹമന്ത്രി സ്​ഥാനത്തുനിന്ന് മാറ്റുകയും ചെയ്​തു. കണ്ണന്താനം ടൂറിസം മന്ത്രിയായി തുടരുമെന്നും രാഷ്​ട്രപതിഭവൻ വാർത്തക്കുറിപ്പിൽ അറിയിച്ചു. തിങ്കളാഴ്​ച രാത്രിയോടെയാണ്​ പ്രധാനമന്ത്രി നരേ​ന്ദ്ര മോദി മന്ത്രിസഭ പുനഃസംഘടിപ്പിച്ചത്​.