പാഞ്ഞെത്തിയ ആ ആഡംബര കാർ തട്ടിയെടുത്തത്​ രണ്ട്​ പൊലീസുകാരുടെ ജീവൻ; സിസിടിവി ദൃശ്യങ്ങൾ പുറത്ത്​

ചെന്നൈ: അമിതവേഗത്തിലെത്തിയ ആഡംബര കാര്‍ ബൈക്കിൽ യാത്ര ചെയ്യുകയായിരുന്ന രണ്ട്​ പൊലീസുകാരെ മരണത്തിലേക്ക്​ ഇടിച്ചുതെറിപ്പിച്ച അപകടത്തിന്‍റെ സിസിടിവി ദൃശ്യങ്ങൾ പുറത്ത്​. ചെന്നൈയിൽ ചൊവ്വാഴ്ച പുലർച്ചെ 4.15ഓടെയായിരുന്നു അപകടം. ആമ്പത്തുർ എസ്റ്റേറ്റ്​ റോഡിലെ സ്വകാര്യസ്​കൂളിന്​ സമീപം നടന്ന അപകടത്തിൽ ചെന്നൈ സിറ്റി പൊലീസിന്‍റെ 13ാമത്​ ബറ്റാലിയനിലെ ഉദ്യോഗസ്ഥരായ ബി. രവീന്ദ്രന് ‍(32), വി. കാര്‍ത്തിക് (34) എന്നിവരാണ് മരിച്ചത്. കാര്‍ ഓടിച്ചിരുന്ന ആമ്പത്തൂര്‍ സ്വദേശി എസ്. അമൃതിനെ (25) പൊലീസ് അറസ്റ്റ് ചെയ്തു.

പുലര്‍ച്ചെ കോയമ്പേടില്‍ ഡ്യൂട്ടിക്ക് പോകുന്നതിനിടെയാണ് പൊലീസുകാര്‍ അപകടത്തില്‍പ്പെട്ടത്. രവീന്ദ്രൻ അവഡിയിലെ ടി.എൻ.ബി.എച്ച്​ ഫ്ലാറ്റിലും കാർത്തിക്​ അന്നനൂറിലുമാണ്​ താമസം. രവീന്ദ്രനാണ്​ ബൈക്ക് ഓടിച്ചിരുന്നത്. മൊഗപ്പൈർ ഈസ്റ്റിലെ ഡി.എ.വി സ്​കൂളിന്​ സമീപത്തുനിന്ന്​ വലത്തേക്ക്​ തിരിഞ്ഞ്​ ആമ്പത്തൂർ എസ്​റ്റേറ്റ്​ റോഡിലേക്ക്​ കയറിയ ബൈക്കിനെ എതിർവശത്തുനിന്ന്​ അതിവേഗത്തിൽ വന്ന ബി.എം.ഡബ്ല്യു കാർ ഇടിക്കുകയായിരുന്നു. ഇടിയുടെ ആഘാതത്തില്‍ ബൈക്ക് മുകളിലേക്ക് ഉയര്‍ന്നുപൊങ്ങുകയും രണ്ടുപേരും തെറിച്ചുവീഴുകയും ചെയ്തു. രവീന്ദ്രന്‍ സംഭവസ്ഥലത്തും കാര്‍ത്തിക്ക് ആശുപത്രിയില്‍വെച്ചുമാണ് മരിച്ചത്.

വിദേശത്ത്​ കെമിക്കൽ എന്‍ജിനീയറിങ് വിദ്യാര്‍ഥിയായ അമൃതിനൊപ്പം കാറിൽ നൊലമ്പൂര്‍ സ്വദേശി വരുണ്‍ ശേഖര്‍(20) കെ.കെ. നഗര്‍ സ്വദേശി രോഹിത് സൂര്യ (21) എന്നിവരും ഉണ്ടായിരുന്നു. വരുണിന്‍റെ ഉടമസ്​ഥതയിലുള്ള കാറിൽ ഇവർ രോഹിത്തിന്‍റെ ജന്മദിനാഘോഷം കഴിഞ്ഞ്​ വരികയായിരുന്നു.