യോഗി കർണാടകയിൽ വന്ന്​ ഉപദേശിക്കുന്ന സമയം കുറക്കണം- സിദ്ധരാമയ്യ

ബംഗളൂരു: ഉത്തര്‍പ്രദേശ് ഉപതിരഞ്ഞെടുപ്പില്‍ ബി.ജെ.പി തോൽവിയുടെ പശ്ചാത്തലത്തിൽ യോഗി ആദ്യനാഥിനെ പരിഹസിച്ച്​ കർണാടക മുഖ്യമന്ത്രി സിദ്ധരാമയ്യ. കർണാടകയിൽ വന്ന്​ വികസനത്തെ കുറിച്ച്​ ഗുണദോഷിക്കുന്ന സമയം യോഗി കുറക്കണമെന്ന്​ സിദ്ധരാമയ്യ ഉപദേശിച്ചു. 

യു.പിയില്‍ ചരിത്ര വിജയം നേടിയ സമാജ് വാദി പാര്‍ട്ടിയേയും ബഹുജൻ സമാജ്​ പാർട്ടിയെയും സിദ്ധരാമയ്യ അഭിനന്ദിച്ചു. ബി.ജെ.പി ഇതര കക്ഷികളുടെ ഐക്യമാണ്​ ഉത്തർപ്രദേശിലെയും ബിഹാറിലെയും തെരഞ്ഞെടുപ്പ്​ വിജയം വ്യക്തമാക്കുന്നതെന്നും അദ്ദേഹം പറഞ്ഞു.  

‘‘ ഉത്തർപ്രദേശിലെ മുഖ്യമന്ത്രിയും ഉപമുഖ്യമരന്തിയും നിലനിർത്തിയിരുന്ന സീറ്റുകൾ കൈവിട്ടത്​​ ബി.ജെ.പിക്ക് അപമാനകരമായ നഷ്ടമാണ്. ചരിത്രവിജയം നേടിയ എസ്​.പിക്കും ബി.എസ്​.പിക്കും അഭിനന്ദനങ്ങൾ. ബി.ജെ.പി ഇതരപാർട്ടികൾ ​െഎക്യം കാത്തുസൂക്ഷിക്കണം. വികസനത്തിനെ കുറിച്ച്​  ഉപദേശം നല്‍കുന്നതിനായി യോഗി ആദിത്യനാഥ് കര്‍ണാടകയില്‍ ചെലവഴിക്കുന്ന സമയം കുറക്കണം’’^ സിദ്ധരാമയ്യ ട്വീറ്റ്​ ചെയ്​തു. 

കര്‍ണാടക നിയമസഭാ തെരഞ്ഞെടുപ്പ് പ്രചാരണത്തിനായി യോഗി ആദിത്യനാഥ്  രണ്ടു തവണ കര്‍ണാടകത്തില്‍ സന്ദര്‍ശനം നടത്തിയിരുന്നു. യു.പിയിലേയും കര്‍ണാടകയിലേയും വികസനവും ഭരണവും സംബന്ധിച്ച് യോഗിയും സിദ്ധരാമയ്യയും തമ്മിൽ വാക്‌പോരും നടന്നിരുന്നു. യു.പി യോഗി ആദിത്യനാഥി​​​​െൻറ മണ്ഡലത്തിലുൾപ്പെടെയുള്ള തോൽവി ബി.ജെ.പിക്കെതിരെ ആയുധമാക്കാനാണ്​ സിദ്ധരാമയ്യയുടെ ശ്രമം.