ദീപാവലി ആശംസയറിയിക്കാതെ സ്റ്റാലിൻ പുതിയ തൊട്ടുകൂടായ്​മക്ക്​ തുടക്കം കുറിച്ചുവെന്ന്​ കേന്ദ്രമന്ത്രി

ന്യൂഡൽഹി: ദീപാവലി ആശംസയറിക്കാതെ സ്റ്റാലിൻ പുതിയ തൊട്ടുകൂടായ്​മക്ക്​ തുടക്കം കുറിച്ചിരിക്കുകയാണെന്ന്​ കേന്ദ്രമന്ത്രി എൽ.മുരുകൻ. ഹിന്ദുക്കളുടെ ഉത്സവമായ ദീപാവലിക്ക്​ അദ്ദേഹം ആശംസയറിയിച്ചിട്ടില്ല. ഇതിന്​ അദ്ദേഹം തമിഴ്​നാട്ടിലെ ജനങ്ങളോട്​ മാപ്പ്​ പറയണം. അഹിന്ദുക്കളുടെ ഉത്സവങ്ങൾക്ക്​ അദ്ദേഹം ആശംസ അറിയിക്കാറുണ്ട്​. എന്നാൽ, ഹിന്ദുക്കളുടെ ആഘോഷങ്ങളെ മനപ്പൂർവം ഒഴിവാക്കുകയാണെന്നും കേന്ദ്രമന്ത്രി കുറ്റപ്പെടുത്തി.

സ്റ്റാലിൻ ദീപാവലി ആശംസകൾ അറിയിക്കാത്തതുമായി ബന്ധപ്പെട്ട്​ നിരവധി ട്വീറ്റുകളാണ്​ വരുന്നത്​. സ്റ്റാലിൻ ദീപാവലി ആശംസകൾ അറിയിക്കാത്തത്​ അദ്ദേഹത്തിന്‍റെ സർക്കാർ എല്ലാവരേയും ഉൾക്കൊള്ളുന്നില്ലെന്നതിന്‍റെ തെളിവാണെന്നായിരുന്നു സംഘപരിവാർ അനുകൂലികൾ ട്വിറ്ററിൽ ഉയർത്തിയ വിമർശനം​. അമേരിക്കൻ പ്രസിഡന്‍റ്​ ജോ ബൈഡനും പാകിസ്​താൻ പ്രധാനമന്ത്രി ഇംറാൻ ഖാനും വരെ ദീപാവലി ആശംസ നേർന്നിരുന്നുവെന്നും​ ട്വീറ്റുകളുണ്ടായിരുന്നു.

ഇതിന്​ ശക്​തമായ ഭാഷയിലാണ്​ ഡി.എം.കെ മറുപടി നൽകിയത്​. മുൻ മുഖ്യമന്ത്രിമാരായ സി.എൻ.അണ്ണാദുരൈയും എം.കരുണാനിധിയും ജനങ്ങൾക്ക്​ ദീപാവലി ആശംസകൾ നേർന്നിരുന്നില്ല. സ്​റ്റാലിനും അതുപോലെ ആശംസകൾ അറിയിച്ചില്ല. ഞങ്ങൾ വിഘടനവാദികളാണ്​ അതുകൊണ്ട്​ നിങ്ങൾക്ക്​ എന്താണ്​ പ്രശ്​നമെന്ന്​ ഡി.എം.കെ എം.പി സെന്തിൽകുമാർ ട്വീറ്ററിലൂടെ ചോദിച്ചു.