രാമക്ഷേത്രത്തിനായി അയോധ്യയിൽ കല്ലുകളിറക്കി വി.എച്ച്​.പി

ന്യൂഡൽഹി: അയോധ്യയിൽ ബാബരി മസ്​ജിദ്​ തകർത്ത സ്​ഥാനത്ത്​ രാമക്ഷേത്രം നിർമിക്കാൻ ബുധനാഴ്​ച വി​ശ്വഹിന്ദു പരിഷത്ത്​ മൂന്ന്​ ലോഡ്​ ചുവന്ന കല്ലുകളിറക്കി. രാമ​േക്ഷത്ര പ്രസ്​ഥാനത്തിന്​ നേതൃത്വം നൽകുന്ന വി.എച്ച്​​.പി വരും ആഴ്​ചകളിൽ കൂടുതൽ ലോഡ്​ കല്ലുകളെത്തിക്കുമെന്നും അറിയിച്ചിട്ടുണ്ട്​. 

ജൂൺ19ന്​ രണ്ട്​ ലോഡ്​ ചുവന്നകല്ലുകൾ ഇറക്കിയ അയോധ്യയിൽ, ഉത്തർപ്രദേശിൽ ബി.ജെ.പി സർക്കാർ അധികാരമേറ്റശേഷം ഇത്​ രണ്ടാംതവണയാണ്​ വീണ്ടും ക്ഷേത്രനിർമാണത്തിനുള്ള കല്ലുകളെത്തുന്നത്​. രാമ​േക്ഷത്രനിർമാണത്തിനായി വി.എച്ച്.പി പ്രത്യേകം ഉണ്ടാക്കിയ രാംസവേക്​ പുരത്താണ്​ കല്ലുകളിറക്കിയത്​. അടുത്ത ആഴ്​ചകളിലായി രാജസ്​ഥാനിലെ ഭരത്​പൂരിൽ നിന്ന്​ 100 ലോഡ്​​ ചുവന്നകല്ലുകളെത്തുമെന്ന്​ വി.എച്ച്​.പി നേതാക്കൾ പറഞ്ഞു.

ബാബരി മസ്​ജിദ്​ തകർത്തതിന്​ എൽ.കെ. അദ്വാനി, മുരളിമനോഹർ ജോഷി, ഉമാഭാരതി തുടങ്ങിയ മുതിർന്ന സംഘ്​പരിവാർ നേതാക്കൾക്കെതിരെ ​ക്രിമിനൽ ഗൂഢാലോചനക്കടക്കം കുറ്റ വിചാരണ നടക്കുന്നതിനിടയിലാണ്​ പുതിയ നീക്കം.ഇവരോടൊപ്പം ബാബരി മസ്​ജിദ്​ തകർത്ത കേസിൽ കുറ്റവിചാരണ നേരിടുന്ന രാം ജന്മഭൂമി ന്യാസ്​ തലവൻ നൃത്യ ഗോപാൽ ദാസി​​​െൻറ നേതൃത്വത്തിലാണ്​ കല്ലുകളിൽ കൊത്തുപണി നടത്തുന്നത്​. ബാബരിഭൂമിയുടെ പേരിലുള്ള അവകാശത്തർക്കം സംബന്ധിച്ച്​ സുപ്രീംകോടതിയിലുള്ള കേസ്​ കോടതിക്ക്​ പുറത്ത്​ തീർപ്പാക്കി രാമക്ഷേത്രനിർമാണം അടിയന്തരമായി തുടങ്ങാൻ ബി.ജെ.പി നേതാവ്​ സുബ്രഹ്​മണ്യം സ്വാമി നടത്തിയ ഇടപെടൽ സുപ്രീംകോടതി തള്ളിയിരുന്നു.