സി.ഐ.എസ്​.എഫിന്‍റെ വെടിയേറ്റ്​ 11കാരന്​ ഗുരുതര പരിക്ക്​

ചെന്നൈ: തമിഴ്​നാട്ടിലെ പുതുക്കോട്ടയിൽ സി.ഐ.എസ്​.എഫിന്‍റെ ഷൂട്ടിങ്​ പരിശീലനത്തിനിടെ 11കാരന്​ അബദ്ധത്തിൽവെടിയേറ്റു. വീടിന്​ മുന്നിൽ കളിച്ചുകൊണ്ടിരുന്ന കുട്ടിയുടെ തലക്കാണ്​ വെടിയേറ്റ്​. പുതുക്കോട്ടയിൽ നരത്താമലയിലാണ്​ സംഭവം.

പരിക്കേറ്റ കുട്ടിയെ ഉടൻ പുതുക്കോട്ട ഗവൺമെന്‍റ്​ മെഡിക്കൽ കോളജ്​ ആശുപത്രിയിൽ പ്രവേശിപ്പിച്ചു. പിന്നീട്​ വിദഗ്​ധ ചികിത്സക്കായി തഞ്ചാവൂർ മെഡിക്കൽ കോളജിലേക്ക്​ മാറ്റി. ഷൂട്ടിങ്​ പരി​ശീലനത്തിനിടെ ബുള്ളറ്റുകളിലൊന്ന്​ ലക്ഷ്യം തെറ്റുകയായിരുന്നുവെന്നാണ്​ പൊലീസിന്‍റെ നിഗമനം.

സംഭവത്തെ കുറിച്ച്​ അന്വേഷണം ആരംഭിച്ചതായി ​പൊലീസ്​ അറിയിച്ചു. സി.ഐ.എസ്​.എഫ്​ ഉദ്യോഗസ്ഥരോട്​ പൊലീസ്​ പ്രാഥമികമായി വിവരങ്ങൾ ചോദിച്ചറിഞ്ഞു. അതേസമയം, ഇക്കാര്യത്തിൽ കൂടുതൽ പ്രതികരണത്തിന്​ തമിഴ്​നാട്​ പൊലീസോ സി.ഐ.എസ്​.എഫോ തയാറായിട്ടില്ല.