ബി.ജെ.പി ദേശീയ നിർവാഹക സമിതിയിൽനിന്ന്​ സുബ്രഹ്മണ്യൻ സ്വാമിയും പുറത്ത്​; ട്വിറ്റർ ബയോ തിരുത്തി എം.പി

ന്യൂഡൽഹി: ബി.ജെ.പി ദേശീയ നിർവാഹക സമിതിയിൽനിന്ന്​ പുറത്തായ പ്രമുഖരാണ്​ സുബ്രഹ്മണ്യൻ സ്വാമി, ​മനേക ഗാന്ധി, വരുൺ ഗാന്ധി എന്നിവർ. വ്യാഴാഴ്ച പ്രഖ്യാപിച്ച പുതിയ സമിതിയിൽ ഇവരുടെ പേരുകൾ ഉൾപ്പെടുത്തിയിട്ടില്ല. ബി.ജെ.പിക്കുള്ളിൽ അഭിപ്രായവ്യത്യാസങ്ങൾകൊണ്ട്​ പുറംതിരിഞ്ഞുനിന്ന്​ വിമർശനങ്ങൾ ഉന്നയിച്ചവരാണ്​ മൂന്നുപേരും.

നിർവാഹക സമിതിയിൽ ​നിന്ന്​ പേരുവെട്ടിയതിന്​ പിന്നാലെ ട്വിറ്ററിൽ ബയോ തിരുത്തിയിരിക്കുകയാണ്​ രാജ്യസഭ എം.പി കൂടിയായ സുബ്രഹ്മണ്യൻ സ്വാമി. 'ബി.ജെ.പി ദേശീയ നിർവാഹക സമിതി അംഗം' എന്നത്​ ട്വിറ്റർ പ്രൊ​ൈഫലിൽനിന്ന്​ ഒഴിവാക്കുകയായിരുന്നു അദ്ദേഹം. ഇതോടെ ബി.ജെ.പിയുമായി ബന്ധപ്പെട്ട യാതൊരു സ്​ഥാനമാനങ്ങളും സുബ്രഹ്മണ്യൻ സ്വാമിയുടെ ട്വിറ്റർ ​പ്രൊഫൈലിൽ ഇല്ല. അതേസമയം രാജ്യസഭ എം.പി, മുൻ കേന്ദ്ര കാബിനറ്റ്​ മന്ത്രി, ഹാർവാർഡ്​ പി.എച്ച്​.ഡി ഇൻ ഇക്കണോമിക്​സ്​; പ്രഫസർ തുടങ്ങിയവ ബയോയിൽ കാണാം.

പ്രധാനമന്ത്രി നരേ​ന്ദ്രമോദിയുടെ സാമ്പത്തിക നയങ്ങളിലെ പ്രധാന വിമർശകരിൽ ഒരാളാണ്​ സുബ്രഹ്മണ്യൻ സ്വാമി. കൂടാതെ മോദി മന്ത്രിസഭയിൽ ധനമന്ത്രിയായിരുന്ന അരുൺ ജെയ്​റ്റ്​ലി, ധനമന്ത്രി നിർമല സീതാരാമൻ എന്നിവരെയും രൂക്ഷമായ ഭാഷയിൽ വിമർശിച്ചിരുന്നു. ആർ.എസ്.എസുമായി അടുപ്പം പുലർത്തുന്ന സ്വാമി പാർട്ടിയെ ചില സമയങ്ങളിൽ പ്രതിരോധത്തിലാക്കിയിരുന്നു.

ലഖിംപൂർ ഖേരി ആക്രമണത്തിൽ ഉൾപ്പെടെ രൂക്ഷമായ പ്രതികരണങ്ങൾ ഉയർത്തിയ വരുൺഗാന്ധിയാണ്​ നിർവാഹക സമിതിയിൽനിന്ന്​ പുറത്തായ മറ്റൊരു നേതാവ്​. മാതാവ്​ മനേക ഗാന്ധിയെയും നിർവാഹക സമിതിയിൽനിന്ന്​ ബി.ജെ.പി ഒഴിവാക്കിയിട്ടുണ്ട്​. കർഷക സമരവുമായി ബന്ധപ്പെട്ട പരാമർശങ്ങളാണ്​ ഇവർക്കെതിരെ കടുത്ത നടപടി സ്വീകരിക്കാൻ ബി.ജെ.പിയെ പ്രേരിപ്പിച്ചതെന്നാണ്​ വിവരം. ​

കേന്ദ്രമന്ത്രി റാവു ഇന്ദർജിത്​ സിങ്​, പ്രഹ്ലാദ്​ പ​േട്ടൽ, സുരേഷ്​ പ്രഭു, ദുശ്യന്ത്​ സിങ്​, വിജയ്​ ഗോയൽ, വിനയ്​ കത്തിയാർ, എസ്​.എസ്​. അലുവാലിയ എന്നിവരും പുതിയ പട്ടികയിൽ ഇടംപിടിച്ചിട്ടില്ല. 80 പേർ അടങ്ങിയതാണ്​ ബി.ജെ.പിയുടെ ദേശീയ നിർവാഹക സമിതി.