'സുഖമാണോ സർ? ഏറെ സ​േന്താഷമുണ്ട്'​....മഞ്ഞുരുകിയ കൂടിക്കാഴ്ചയിൽ ഒന്നായി സിധുവും ക്യാപ്​റ്റനും -വിഡിയോ

ചണ്ഡിഗഢ്​​: ക്യാപ്​റ്റനെ കണ്ടമാത്രയിൽ കൈകൂപ്പി 'ഗാർഡെടുത്ത്​' സിധു ചോദിച്ചു. 'സർ സുഖമാണോ..അങ്ങയെ കണ്ടതിൽ അത്രയേറെ സന്തോഷമുണ്ട്​'...ഏറെക്കാലമായി വൈരം കൊണ്ടുനടക്കുന്ന നേതാക്കന്മാർക്കിടയിലെ മഞ്ഞുരുക്കാൻ ഇന്ത്യൻ ക്രിക്കറ്റിലെ ബാറ്റിങ്​ ജീനിയസായിരുന്ന സിധുവിന്‍റെ ആ ഒരു 'ഷോട്ട്​' മാത്രം മതിയായിരുന്നു. ആ ചോദ്യത്തിലൂടെ ക്യാപ്​റ്റന്‍റെ പരിഭവങ്ങളെല്ലാം സിധു ബൗണ്ടറി കടത്തി. കണ്ടിരുന്ന 'ഗാലറി'യിൽ അതിന്‍റെ ആവേശവും സന്തോഷവും. പഞ്ചാബിലെ കോൺഗ്രസ്​ ഒരുപാടുകാലമായി കാത്തിരുന്ന നിമിഷമായിരുന്നു അത്​. ഐക്യത്തിന്‍റെ ക്രീസിൽ ഒരുമിക്കുന്ന നവ്​ജോത്​ സിങ്​ സിധുവും മുഖ്യമന്തി ക്യാപ്​റ്റൻ അമരീന്ദർ സിങ്ങും. ഇരുവരും ഒന്നിച്ച ആവേശത്തിൽ കോൺഗ്രസ്​ ഇനി തെരഞ്ഞെടുപ്പിന്‍റെ പോരിടത്തിലേക്കിറങ്ങും. ആ ഗോദയിൽ, പാർട്ടി സംസ്​ഥാന അധ്യക്ഷനായി തെരഞ്ഞെടു​ക്ക​െപ്പട്ട സിധുവും അമരീന്ദറും ഒന്നിച്ചുചേർന്ന്​ കോൺഗ്രസ്​ ഇന്നിങ്​സിനെ നയിക്കും.

പഞ്ചാബ്​ ഭവനിൽ പി.സി.സി അധ്യക്ഷ പദവി ഏറ്റെടുക്കുന്നതിന്​ മുന്നോടിയായി നടന്ന ചടങ്ങിനിടെയാണ്​ സിധുവും അമരീന്ദർ സിങ്ങും കണ്ടുമുട്ടിയത്​. തീൻമേശക്കരികെ ഇരിക്കുകയായിരുന്ന മുഖ്യമന്ത്രിക്ക്​ മുന്നിലെത്തിയാണ്​ സിധു കൈകൂപ്പി കുശലാ​േന്വഷണം നടത്തിയത്​. തുടർന്ന്​ തന്‍റെ എതിർവശത്തായി ഇരിക്കാൻ ഒരുങ്ങിയ സിധുവിനെ തൊട്ടടുത്തേക്ക്​ അമരീന്ദർ ക്ഷണിച്ചിരുത്തുകയായിരുന്നു. വളരെ സൗഹൃദപരമായിരുന്നു ഇരുവരും തമ്മിലുള്ള കൂടിക്കാഴ്ചയെന്ന്​ സംസ്​ഥാനത്തെ പ്രമുഖ കോൺഗ്രസ്​ നേതാക്കളിലൊരാൾ പറഞ്ഞു.

സർക്കാർ തീരുമാനങ്ങളെ നിശിതമായി വിമർശിച്ചുകൊണ്ടിരുന്ന സിധുവിനെതിരെ അമരീന്ദറും ശക്​തമായ രീതിയിൽ പ്രതികരിച്ചതോടെയാണ്​ പിണക്കം മുറുകിയത്​. ഇടഞ്ഞുനിന്നു സിധുവിനെ പഞ്ചാബ്​ കോൺഗ്രസ്​ അധ്യക്ഷനായി പ്രഖ്യാപിച്ചാണ്​ ​ൈഹക്കമാൻഡ്​ വെടിനിർത്തലിന്​ കളമൊരുക്കിയത്​. തുടക്കത്തിൽ കടുത്ത എതിർപ്പുയർത്തിയ അ​മ​രീ​ന്ദ​ർ സി​ങ്ങിനെ ഏറെ പണിപ്പെട്ട്​ അനുനയിപ്പിച്ചാ​യിരുന്നു ​പാർ​ട്ടി അ​ധ്യ​ക്ഷ സോ​ണി​യ ഗാ​ന്ധി നിയമനം നടത്തിയത്​.

പഞ്ചാബ്​ കോൺഗ്രസിലെ എല്ലാവരെയും ഒരുമിച്ച്​ കൊണ്ടുപോവുകയാണ്​ തന്‍റെ ലക്ഷ്യമെന്ന്​ സംസ്​ഥാന കോൺഗ്രസ്​ അധ്യക്ഷനായി നിയമിതനായ ഉടൻ​ സിധു പ്രഖ്യാപിച്ചിരുന്നു. തന്‍റെ യാത്ര തുടങ്ങി​േട്ടയുള്ളൂവെന്നും പാർട്ടിയെ വീണ്ടും അധികാരത്തിലെത്തിക്കുകയാണ്​ ഉന്നമെന്നും സിധു വ്യക്​തമാക്കുകയും ചെയ്​തിരു​ന്നു. 'പഞ്ചാബിൽ വിജയം ആവർത്തിക്കുകയെന്ന ലക്ഷ്യപൂ​ർത്തീകരണത്തിനായി എളിയ കോൺഗ്രസുകാരൻ എന്ന നിലക്ക്​ സംസ്​ഥാനത്തെ ഒാരോ പാർട്ടി അംഗത്തെയും ചേർത്തുനിർത്തി പ്രവർത്തിക്കും​. പഞ്ചാബ്​ മാതൃകയും ഹൈക്കമാൻഡിന്‍റെ 18ഇന അജണ്ടയും മുൻനിർത്തി കോൺഗ്രസിനെ വീണ്ടും അധികാരത്തിലെത്തിക്കും' -അധ്യക്ഷ പദവിയിലെത്തിയതിനുപിന്നാലെ സിധുവിന്‍റെ പ്രതികരണം ഇതായിരുന്നു.