ഭീമ–കൊറേഗാവ്​ കേസ്​: ഡൽഹി സർവകലാശാലയിലെ മലയാളി പ്രഫസർക്ക് എൻ.ഐ.എ​ സമൻസ്​

മുംബൈ: ഭീമ–കൊറേഗാവ്​ സംഘർഷ കേസിൽ ചോദ്യംചെയ്യലിന്​ ഹാജരാകാൻ മലയാളിയായ ഡൽഹി സർവകലാശാല ഇംഗ്ലീഷ്​ പ്രഫസർ ഹനി ബാബു തറയിലിന്​ ദേശീയ അന്വേഷണ ഏജൻസിയുടെ (എൻ.െഎ.എ) സമൻസ്​. വെള്ളിയാഴ്​ച ഹാജരാകാനാണ്​ ആവശ്യപ്പെട്ടത്​. സാക്ഷിയായി ഇദ്ദേഹത്തിൻെറ മൊഴി രേഖപ്പെടുത്തുമെന്ന്​​ എൻ.െഎ.എ വൃത്തങ്ങൾ പറഞ്ഞു. 

2018ൽ പുണെ പൊലീസ്​ ഇദ്ദേഹത്തിന്‍റെ നോയിഡയിലുള്ള വീട്​ റെയ്​ഡ്​ നടത്തി മൊബൈലുകളും ലാപ്​ടോപ്പും പിടിച്ചെടുത്തിരുന്നു. ജൂലൈ 15ന്​ ഹാജരാകാൻ ആവശ്യപ്പെട്ട്​ എൻ.െഎ.എ നേരത്തെ സമൻസ്​ അയച്ചിരുന്നെങ്കിലും ലോക്​ ഡൗണിനെ തുടർന്ന്​ മുംബൈയിലെത്താൻ കഴിഞ്ഞില്ല. 

വീഡിയോ കോൺഫറൻസ്​ വഴി മൊഴിനൽകാൻ ഇദ്ദേഹം തയാറായിരുന്നെങ്കിലും നേരിട്ട്​ മൊഴിയെടുക്കണമെന്ന നിലപാടിലായിരുന്നു എൻ.െഎ.എ. തുടർന്നാണ്​ പുതിയ സമൻസ്​. 

കേസുമായി ബന്ധപ്പെട്ട പുണെ പൊലീസിൻെറ എഫ്​.െഎ.ആറിൽ ഹനി ബാബു തറയിലിൻെറ പേരില്ല. ജാതീയ വിവേചനത്തിന്​ എതിരെ പ്രവർത്തിക്കുന്ന ഹനി, മാവോവാദി​ ബന്ധമാരാപിക്കപ്പെട്ട്​ ജീവപര്യന്തം തടവിൽ കഴിയുന്ന അംഗപരിമിതനായ ഡൽഹി സർവകലാശാല പ്രഫസർ ജി.എൻ. സായിബാബക്ക്​ നീതി തേടുന്ന സമിതിയിൽ അംഗവുമാണ്​.