ത്വലാഖ്​ നിരോധിക്കാനുള്ള ഹരജി സുപ്രീംകോടതി അടിയന്തിരമായി കേൾക്കും

ന്യൂഡൽഹി: ഇസ്​ലാമിലെ യഥാർഥ വിവാഹ മോചന രീതികളിലൊന്നായ ത്വലാഖ്​ (ത്വലാഖെ ഹസൻ) നിരോധിക്കണമെന്ന്​ ആവശ്യപ്പെട്ട്​ സമർപ്പിച്ച ഹരജി അടിയന്തിരമായി കേൾക്കാമെന്ന്​ സുപ്രീംകോടതി. അഡ്വ. അശ്വനി കുമാർ ദുബെ മുഖേന ബേനസീർ ഹിന എന്ന മാധ്യമപ്രവർത്തക സമർപ്പിച്ച പൊതു താൽപര്യ ഹരജി നാല്​ ദിവസത്തിനകം കേൾക്കാമെന്ന്​ ചീഫ്​ ജസ്റ്റിസ്​ എൻ.വി രമണ വ്യക്​തമാക്കി.

അഡ്വ. പിങ്കി ആനന്ദ്​ ആണ്​ തിങ്കളാഴ്ച ഹരജി ചീഫ്​ ജസ്റ്റിസിന്‍റെ ശ്രദ്ധയിൽപ്പെടുത്തിയത്​. ഇസ്​ലാമിക പ്രമാണങ്ങളിലില്ലാത്ത ഒറ്റയിരിപ്പിൽ മൂന്ന്​ മൊഴിയും ഒരുമിച്ചുചൊല്ലുന്ന മുത്തലാഖ്​ നിരോധിച്ചതിന്​ പിന്നാലെയാണ് ചുരുങ്ങിയത്​​ ഓരോ മാസത്തെ ഇടവേള വെച്ച്​ മൂന്ന്​ തവണകളായി ചൊല്ലുന്ന ത്വലാഖും നിരോധിക്കണമെന്ന ഹരജി വന്നിരിക്കുന്നത്​.

ഓരോ മാസത്തെ ഇടവേളയിൽ​ മൂന്ന്​ പ്രാവശ്യമായി ത്വലാഖ്​ ചൊല്ലിയെന്നും ഇത്​ വിവേചനപരവും ഭരണഘടനയുടെ 14,15,21, 25 അനുഛേദനങ്ങളുടെ ലംഘനവുമായതിനാൽ നിരോധിക്കണമെന്നുമാണ്​ ഹരജിക്കാരിയുടെ ആവശ്യം.

ആദ്യ​ ത്വലാഖ്​ ഏപ്രിൽ19ന്​ സ്പീഡ്​ പോസ്റ്റായി അയച്ച ഭർത്താവ്​ തുടർന്ന്​ അടുത്ത രണ്ട്​ മാസങ്ങളിലായി രണ്ട്​ ത്വലാഖും അയച്ചു എന്ന്​ ഹരജിക്കാരി പറയുന്നു.