സുപ്രീംകോടതി ജാമ്യം നീട്ടി; സുബൈർ ജയിലിൽതന്നെ

ന്യൂഡൽഹി: ആൾട്ട്​ ന്യൂസ്​ സഹ സ്ഥാപകൻ മുഹമ്മദ്​ സുബൈറിന്​ യു.പിയിലെ സീതാപുർ കേസിൽ നൽകിയ ഇടക്കാല ജാമ്യം സു​പ്രീംകോടതി നീട്ടി നൽകി. അതേസമയം, യു.പിയിലെതന്നെ ലഖിംപുർ ഖേരിയിലെയും ഡൽഹിയിലെയും കേസുകളിൽ ജുഡീഷ്യൽ റിമാൻഡിലായതിനാൽ സു​ബൈർ ജയിലിൽ തുടരും.

മതനേതാക്കളെ നിന്ദിച്ചുവെന്ന ചെയ്യാത്ത കുറ്റത്തിന്​ സീതാപുരിൽ യു.പി പൊലീസ്​ തനിക്കെതിരെ രജിസ്റ്റർ ചെയ്ത കേസ് തള്ളണമെന്ന്​ ആവശ്യപ്പെട്ടാണ്​​ മുതിർന്ന അഭിഭാഷകൻ കോളിൻ ഗോൺസാൽവസ്​ മുഖേന സുബൈർ സുപ്രീംകോടതിയിലെത്തിയത്​. സുബൈറിന്‍റെ ഹരജിയിൽ എതിർ സത്യവാങ്​മൂലം സമർപ്പിക്കാനുണ്ടെന്ന്​ യു.പി പൊലീസിന്​ വേണ്ടി ഹാജരായ അഡീഷനൽ സോളിസിറ്റർ ജനറൽ എസ്​.വി രാജു സുപ്രീംകോടതിയോട്​ പറഞ്ഞു. ഇതേ തുടർന്ന്​ നാലാഴ്ച യു.പി പൊലീസിന്​ സമയം നൽകിയ ജസ്റ്റിസ്​ ഡി.വൈ ചന്ദ്രചൂഡ്​ അധ്യക്ഷനായ ബെഞ്ച്​ കേസ്​ വീണ്ടും പരിഗണിക്കാനായി സെപ്​റ്റംബർ ഏഴിലേക്ക്​ മാറ്റി. ഈ കേസിലെ ഇടക്കാല ജാമ്യത്തിന്‍റെ കാലാവധി ചൊവ്വാഴ്ച തീരുകയാണെന്ന്​ കോളിൻ ഗോൺസാൽവസ്​ അറിയിച്ചപ്പോൾ ഇനിയൊരുത്തരവ്​ വരെ ഇടക്കാല ജാമ്യവും നീട്ടി നൽകി.

മുസ്​ലിം വംശഹത്യക്ക്​ ആഹ്വാനം നൽകി അറസ്റ്റിലായ യതി നരസിംഗാനന്ദ, മുസ്​ലിം സ്ത്രീകളെ വീടുകളിൽ പോയി ബലാത്സംഗം ആഹ്വാനം ​ചെയ്ത ബജ്​രംഗ്​ മുനി, ആനന്ദ്​ സ്വരൂപ്​ എന്നിവർ നടത്തിയ വിദ്വേഷ പ്രചാരണം പുറത്തുകൊണ്ടുവന്നതിനാണ്​ സുബൈറിനെതിരെ കേസെടുത്തതെന്നും വിദ്വേഷപ്രചാരകർ പുറത്തും വിദ്വേഷ പ്രചാരണം പുറത്തുകൊണ്ടുവന്ന സുബൈർ ജയിലിലുമാണെന്നും കോളിൻ വാദിച്ചു. എന്നാൽ, ഇവർ മതനേതാക്കളാണെന്നും സുബൈറിന്‍റെ നടപടി മതനിന്ദയാണെന്നുമാണ്​ കേന്ദ്ര സർക്കാറിന്‍റെ എ.എസ്​.ജി എസ്​.വി രാജു വാദിച്ചത്​.

സുബൈർ മതവിഭാഗങ്ങൾക്കിടയിൽ ശത്രുതയുണ്ടാക്കിയെന്ന്​ ആരോപിച്ച്​ ആശിഷ്​ കുമാർ കതിയാർ എന്ന പ്രാദേശിക ടി.വി ജേണലിസ്റ്റ്​ നൽകിയ കേസിൽ ലഖിംപുർ കോടതി 14 ദിവസത്തേക്കാണ്​ സുബൈറിനെ റിമാൻഡ്​ ചെയ്തത്​. ഉത്തർപ്രദേശിലെ സീതാപുർ കോടതിയിലെ കേസിൽ സുപ്രീംകോടതി ഇടക്കാല ജാമ്യം അനുവദിച്ചിട്ടും ഡൽഹി പൊലീസ് കേസ്​ മൂലം മോചനം ലഭിക്കാത്ത സുബൈറിന്​ വീണ്ടും 14 ദിവസത്തെ ജയിൽവാസത്തിന്​ വഴിയൊരുക്കുന്നതാണ്​ യു.പി കോടതി വിധി