അവതാരകർക്കും പങ്കുണ്ട്​, ടെലിവിഷൻ ചാനലുകളിലെ വിദ്വേഷ പ്രസംഗം സർക്കാർ തടയാത്തത്​ എന്തുകൊണ്ടെന്ന്​ സുപ്രീംകോടതി

ന്യൂഡൽഹി: മുഖ്യധാര ടെലിവിഷൻ ചാനലുകളിലൂടെ പുറത്തുവരുന്ന വിദ്വേഷ പ്രസംഗത്തിൽ അവതാരകരുടെ പങ്ക്​ വളരെ വലുതാണെന്ന്​ സുപ്രീംകോടതി. വിദ്വേഷക പ്രസംഗങ്ങൾ വർധിക്കു​േമ്പാൾ ഇത്തരം ചാനലുകൾക്ക്​ നിയന്ത്രണങ്ങൾ കൊണ്ടുവരാരെ സർക്കാർ കാഴ്​ചക്കാരായി തുടരുന്നതെന്താണെന്നും സുപ്രീംകോടതി ചോദിച്ചു. മുഖ്യധാര മാധ്യമങ്ങളിലും സമൂഹമാധ്യമങ്ങളിലുമുള്ള ഇത്തരം വിദ്വേഷ പ്രസംഗങ്ങൾ നിയന്ത്രിക്കാൻ ആരുമില്ല. ഇത്തരം പ്രസംഗങ്ങൾ പുറത്തുവരുന്നതിൽ അവതാരകർക്കും തുല്യ പങ്കുണ്ട്​.

പത്രസ്വാതന്ത്ര്യം പ്രധാനപ്പെട്ടതാണ്​. നമ്മുടെ പത്രസ്വാതന്ത്ര്യം യു.എസിലെ പോലെ സ്വതന്ത്രമല്ല. എവിടെ നിയന്ത്രണരേഖ വെക്കണം എന്നതിൽ വ്യക്തത വേണം. വിദ്വേഷ പ്രസംഗങ്ങൾക്കെതിരായ ഹരജികൾ സ്വീകരിച്ചുകൊണ്ട്​ ജസ്​റ്റിസ്​ കെ.എം. ജോസഫ്​ നിരീക്ഷിച്ചു. വിദ്വേഷ പ്രസംഗം ഒരു പാളിയാണ്​. ഒരാളെ കൊല്ലുന്നതു പോലെ തന്നെ.

നിങ്ങൾക്കി​ത്​ വിവിധ രീതിയിൽ ചെയ്യാം... ചിലപ്പോൾ പതുക്കെ, അല്ലെങ്കിൽ മറ്റ്​ വഴികളിലൂടെ. വിദ്വേഷ പ്രസംഗത്തിൽ കാഴ്​ചക്കാർക്ക്​ താൽപര്യമുണ്ടാകുന്നത്​ എന്തുകൊണ്ടാണെന്ന്​ വിശദീകരിക്കവെ കോടതി ചൂണ്ടിക്കാട്ടി. ഈവിഷയത്തിൽ സർക്കാർ എതിർ നിലപാട്​ സ്വീകരിക്കരുതെന്നും കോടതിയെ സഹായിക്കണമെന്നും അഭ്യർഥിച്ചു. വിഷയം അടുത്ത നവംബർ 23ന്​ വാദം കേൾക്കുമെന്നും കോടതി വ്യക്തമാക്കി. വിദ്വേഷ പ്രസംഗങ്ങൾ നിയന്ത്രിക്കാൻ നിലവിലുള്ള നിയമം നടപ്പാക്കാൻ മുൻകൈയെടുക്കുമോ എന്ന കാര്യത്തിൽ കേന്ദ്ര സർക്കാർ വിശദീകരണം നൽകണമെന്നും സുപ്രീംകോടതി ആവശ്യപ്പെട്ടു.

വിദ്വേഷ പ്രസംഗങ്ങൾ സംബന്ധിച്ച്​ സുപ്രീം കോടതിയുടെ നിർദേശപ്രകാരം ലോ കമ്മീഷൻ 2017ൽ പ്രത്യേക നിയമങ്ങൾ ശുപാർശ ചെയ്ത് റിപ്പോർട്ട് സമർപ്പിച്ചിരുന്നു.