തെരഞ്ഞെടുപ്പിന്​ മുമ്പ്​ രാഷ്​ട്രീയപാർട്ടികൾ നൽകുന്ന സൗജന്യങ്ങളിൽ ഇടപ്പെട്ട്​ സുപ്രീംകോടതി; കേന്ദ്രത്തിനും തെരഞ്ഞെടുപ്പ്​ കമീഷനും നോട്ടീസ്​

ന്യൂഡൽഹി: തെരഞ്ഞെടുപ്പിന്​ മുമ്പ്​ രാഷ്​ട്രീയപാർട്ടികൾക്ക്​ ജനങ്ങൾ സൗജന്യമായി വസ്​തുക്കൾ നൽകുന്ന പ്രശ്​നത്തിൽ ഇടപ്പെട്ട്​ സുപ്രീംകോടതി. പൊതുഫണ്ട്​ ഉപയോഗിച്ച്​ ഇത്തരത്തിൽ തെരഞ്ഞെടുപ്പിന്​ മുമ്പ്​ വിവിധ സമ്മാനങ്ങൾ നൽകുന്നതിലാണ്​ സുപ്രീംകോടതി ഇടപെടൽ. പലപ്പോഴും ബജറ്റിനേക്കാളും കൂടുതൽ പണം ഇത്തരം വസ്​തുക്കൾ വാങ്ങാൻ ഉപയോഗിക്കുന്നുണ്ട്​. ഇതൊരു ഗൗരവകരമായ വിഷയമാണെന്നും സുപ്രീംകോടതി നിരീക്ഷിച്ചു.

നാലാഴ്​ചക്കകം ഇക്കാര്യത്തിൽ മറുപടി നൽകാൻ കേന്ദ്രസർക്കാറിനോടും തെരഞ്ഞെടുപ്പ്​ കമീഷനോടും കോടതി ആവശ്യപ്പെട്ടിട്ടുണ്ട്​. ഇക്കാര്യത്തിൽ ചട്ടങ്ങളുണ്ടാക്കാൻ തെരഞ്ഞെടുപ്പ്​ കമ്മീഷനോട്​ നിർദേശിച്ചിരുന്നു. എന്നാൽ, രാഷ്​ട്രീയപാർട്ടികളുടെ ഒരു യോഗം വിളിക്കുകയാണ്​ അവർ ചെയ്​തത്​. അതിന്​ ശേഷം എന്താണ്​ സംഭവിച്ചതെന്ന്​ അറിയില്ലെന്ന്​ സുപ്രീംകോടതി ചീഫ്​ ജസ്​റ്റിസ്​ എൻ.വി രമണ വ്യക്​തമാക്കി.

ചീഫ്​ ജസ്​റ്റിസ്​ എൻ.വി രമണ, ജസ്​റ്റിസ്​ എ.എസ്​ ബോപ്പണ്ണ, ജസ്​റ്റിസ്​ ഹിമ കോഹ്​ലി എന്നിവരുൾപ്പെട്ട ബെഞ്ചാണ്​ ഇതുമായി ബന്ധപ്പെട്ട ഹരജി പരിഗണിച്ചത്​. അഭിഭാഷകനായ അശ്വിനി ഉപാധ്യായയാണ്​ കേസുമായി സുപ്രീംകോടതിയെ സമീപിച്ചത്​. പൊതുപണം ഉപയോഗിച്ച്​ നൽകുന്ന സൗജന്യ സമ്മാനങ്ങൾ സ്വതന്ത്രവും നീതിപൂർവവുമായ തെരഞ്ഞെടുപ്പിന്​ തടസമാണെന്ന്​ ഹരജിക്കാരൻ വാദിച്ചു.