രാജ്യദ്രോഹക്കുറ്റം ശരിയാണോ? പരിശോധിക്കാൻ സുപ്രീം കോടതി, കേന്ദ്രത്തി​െൻറ വിശദീകരണം തേടി

ന്യൂഡൽഹി: രാജ്യത്ത്​ ഏറ്റവും കൂടുതൽ ദുരുപയോഗം ചെയ്യപ്പെടുന്നുവെന്ന്​ ആക്ഷേപമുയർന്ന ഇന്ത്യൻ ശിക്ഷാനിയമം 124 എ വകുപ്പ്​ പ്രകാരമുള്ള രാജ്യദ്രോഹക്കുറ്റത്തി​െൻറ സാധുത പരിശോധിക്കാൻ സുപ്രീം കോടതി. ഇതുസംബന്ധിച്ച പൊതുതാൽപര്യ ഹരജി പരിഗണിച്ച​ ജസ്​റ്റീസുമാരായ യു.യു ലളിത്​, ഇന്ദിര ബാനർജി, കെ.എം ജോസഫ്​ എന്നിവരടങ്ങിയ ബെഞ്ച്​ വിഷയത്തിൽ കേന്ദ്ര സർക്കാറി​െൻറ വിശദീകരണം തേടി. മൂന്നുമാസത്തിനിടെ രണ്ടാം തവണയാണ്​ സമാന കേസ്​ കേ​ാടതിയുടെ പരിഗണനക്ക്​ വരുന്നത്​.

മണിപ്പൂർ, ഛത്തീസ്​ഗഢ്​ സംസ്​ഥാനങ്ങളിൽനിന്നുള്ള രണ്ടു മാധ്യമ പ്രവർത്തകരാണ്​ ഹരജിക്കാർ. അഭിപ്രായ സ്വാതന്ത്ര്യം ഹനിക്കുന്നതാണ്​ ഈ വകുപ്പെന്ന്​ പൊതുതാൽപര്യ ഹരജിയിൽ പറയുന്നു. ഭരണഘടനയുടെ 19(1)(എ) ഉറപ്പുനൽകുന്നതാണ്​ അഭിപ്രായ സ്വാതന്ത്ര്യം.

സംസ്​ഥാന സർക്കാറുകൾക്കും കേന്ദ്രത്തിനുമെതിരെ ചോദ്യം ഉയർത്തിയതിന്​ തങ്ങൾക്കെതിരെ 124 എ വകുപ്പ്​ ചുമത്തിയതായി ഇരുവരും കുറ്റപ്പെടുത്തി. സമൂഹ മാധ്യമമായ ഫേസ്​ബുക്കിൽ കാർട്ടൂണുകൾ പങ്കുവെച്ചതിനും അഭിപ്രായം പറഞ്ഞതിനുമാണ്​ കേസ്​.

1962നു ശേഷം 124 എ നിയമം വ്യാപകമായി ദുരുപയോഗം ചെയ്​തതായി പരാതിയിൽ പറയുന്നു. വ്യാപക ദുരുപയോഗം അതി​െൻറ സാധുത മാത്രമല്ല, നിയമത്തിലെ അവ്യക്​തകളും അനിശ്​ചിതത്വവും വ്യക്​തമാക്കുന്നു. ജനാധിപത്യം വാഗ്​ദാനം ചെയ്യുന്ന സ്വാതന്ത്ര്യത്തിനു മേലും അത്​ ദുസ്സ്വാധീനം ചെലുത്തുന്നു. മുമ്പ്​ കോളനിയായിരുന്ന രാജ്യങ്ങൾ പിന്നീട്​ ഈ വകുപ്പ്​ ജനാധിപത്യവിരുദ്ധവും അനാശാസ്യവും അനാവശ്യവുമാണെന്ന്​ കണ്ടെത്തി എടുത്തുകളഞ്ഞതായി പരാതിക്കാർ വ്യക്​തമാക്കി.

മൂന്നു മാസം മുമ്പ്​ മൂന്ന്​ അഭിഭാഷകർ ചേർന്ന്​ ഇതേ പരാതി നൽകിയിരുന്നുവെങ്കിലും സുപ്രീം കോടതി തള്ളുകയായിരുന്നു. 1860ൽ ബ്രിട്ടീഷ്​ ഭരണത്തിൽ നിലവിൽ വന്നതാണ്​ ഇന്ത്യൻ ശിക്ഷാനിയമം. 1962ൽ കേദാർ നാഥ്​ സിങ്​- ബിഹാർ സർക്കാർ കേസിൽ രാജ്യദ്രോഹ കുറ്റത്തി​െൻറ സാധുത സുപ്രീം കോടതി അംഗീകരിച്ചിരുന്നു. ആറു പതിറ്റാണ്ട്​ മുമ്പ്​ അത്​ ശരിയാകാമെങ്കിലും ഇപ്പോൾ അതിന്​ സാധുത കാണുന്നില്ലെന്ന്​ പരാതിയിൽ ചൂണ്ടിക്കാട്ടി.