തൃണമൂലിൻറെ 'ഖേലെ ഹോബെ ദിവസി'ന്​ ബദലായി 'ബംഗാൾ ബച്ചാവോ ദിവസ്​'; പ്രതിഷേധിച്ച​ ബി.ജെ.പി നേതാക്കൾ അറസ്​റ്റിൽ

കൊൽക്കത്ത: ബംഗാളിൽ കോവിഡ്​ മാനദണ്ഡം ലംഘിച്ച്​ പ്രതിഷേധം സംഘടിപ്പിച്ചതിന്​ സംസ്​ഥാന അധ്യക്ഷൻ ദിലീപ്​ ഘോഷ്​, പ്രതിപക്ഷ നേതാവ്​ സുവേന്ദു അധികാരി ഉൾപ്പെടെ ഡസൻ കണക്കിന്​ ബി.ജെ.പി നേതാക്കൾ അറസ്​റ്റിൽ. നേതാക്കൾ ഉൾപ്പെടെ 150ഓളം ​പ്രവർത്തകരെ അറസ്​റ്റ്​ ചെയ്​തതായി ബി.ജെ.പി ആരോപിച്ചു.

തിങ്കളാഴ്​ച തൃണമൂൽ കോൺഗ്രസ്​ 'ഖേലെ ഹോബെ ദിവസ്​' ആചരിച്ചിരുന്നു. ഇതിന്​ ബദലായി കൊൽക്കത്തയിലെ മായോ പ്രതിമക്ക്​ മുമ്പിൽ പ്രതിഷേധം സംഘടിപ്പിക്കുകയായിരുന്നു ബി.ജെ.പി. 'പശ്ചിമബംഗാൾ ബച്ചാവോ ദിവസ്​ (സേവ്​ വെസ്​റ്റ്​ ബംഗാൾ ​ഡേ)' എന്ന പേരിലായിരുന്നു ബി.ജെ.പിയ​ുടെ​ പ്രതിഷേധം. സംസ്​ഥാനത്ത്​ ജനാധിപത്യം ഇല്ലെന്ന്​ പറഞ്ഞായിരുന്നു ബി.ജെ.പിയുടെ പ്രതിഷേധ പരിപാടികൾ.

റാണി രശ്​മോനി അവന്യൂവിൽ ധർണ സംഘടിപ്പിക്കുമെന്ന്​ ബി.ജെ.പി പ്രഖ്യാപിച്ചിരുന്നു. എന്നാൽ ധർണക്ക്​ അനുമതി ലഭിച്ചിരുന്നില്ല. എങ്കിലും തിങ്കളാഴ്​ച അവർ ഗാന്ധി പ്രതിമക്ക്​ മുമ്പിൽ പ്രത്യക്ഷപ്പെടുകയായിരുന്നു. തുടർന്ന്​ പൊലീസിസെത്തി ബി.ജെ.പി നേതാക്കളെ കസ്​റ്റഡിയിലെടുത്തു. കൊൽക്കത്ത ലാൽ ബസാറിലെ പൊലീസ്​ ആസ്​ഥാനത്ത്​ എത്തിച്ച നേതാക്കളെ പിന്നീട്​ വിട്ടയച്ചു.

സേവ്​ പശ്ചിമ ബംഗാൾ ദിനത്തിൽ ബി.ജെ.പി നേതാക്കളെ പക്ഷപാതപരമായി അറസ്​റ്റ്​ ചെയ്​ത്​ ജനാധിപത്യത്തെ ​െകാലപ്പെടുത്തിയതായി ബി.ജെ.പി ആരോപിച്ചു.

ആഗസ്​റ്റ്​ 16ന്​ ഖേല ഹോബെ ദിവസായി ആചരിക്കാൻ തൃണമൂൽ തീരുമാനിച്ചിരുന്നു. 1980ൽ ആഗസ്​റ്റ്​ 16ന്​ തിക്കിലും തിരക്കിലും പെട്ട്​ മരിച്ച 16 ഫുട്​ബാൾ ആരാധകർക്ക്​ ആദരാഞ്​ജലി അർപ്പിക്കുന്നതിനും കായിക വിനോദങ്ങൾ പ്രോത്സാഹിപ്പിക്കുന്നതിനുമാണ്​​ ഖേല ഹോബെ ദിവസ്​ തൃണമൂൽ ആചരിക്കുക. ഇതി​െൻറ ഭാഗമായി സംസ്ഥാനത്ത്​ ഉടനീളം ഫുട്​ബാൾ മാച്ചുകൾ സംഘടിപ്പിച്ചിരുന്നു.