കൈരാനയിൽ ബി.ജെ.പിയെ തറപറ്റിച്ച്​ തബസ്സും

കൈരാന: രാജ്യം ഉറ്റുനോക്കിയ ഉത്തർപ്രദേശിലെ കൈരാന മണ്ഡലത്തിൽ ആർ.എൽ.ഡി-എസ്​.പി സംയുക്​ത സ്ഥാനാർഥി ബീഗം തബസ്സും ഹസന്​ തിളക്കമാർന്ന വിജയം. 40,000ത്തിലേറെ വോട്ടുകൾക്കാണ്​ ബി.ജെ.പിയുടെ മൃഗാങ്ക സിങ്ങിനെ തബസ്സും പരാജയപ്പെടുത്തിയത്​. 

രാഷ്​ട്രീയ ലോക്​ ദൾ സ്ഥാനാർഥിയായ തബസ്സുമിനെ ബി.എസ്​.പി, കോൺഗ്രസ്​ പാർട്ടികളും പിന്തുണച്ചിരുന്നു. ആർ.എൽ.ഡിയിൽ ചേരുന്നതിന്​ മുമ്പ്​ ബി.എസ്​.പി ടിക്കറ്റിൽ തബസ്സും 2009ൽ ലോക്​സഭയിലേക്ക്​ വിജയിച്ചിരുന്നു. ബി.ജെ.പിയുടെ എം.പി ഹുകും സിങ്​ മരിച്ച ഒഴിവിലേക്കാണ്​ പുതിയ ഉപതെരഞ്ഞെടുപ്പ്​ നടന്നത്​. സിങി​​​​​​​െൻറ മകളാണ്​ മൃഗാങ്ക സിങ്​.

ബി.ജെ.പിക്കെതിരായ സംയുക്​ത ​പ്രതിപക്ഷ പരീക്ഷണമെന്ന നിലയിൽ ദേശീയ തലത്തിൽ ശ്രദ്ധയാകർഷിച്ച മണ്ഡലമായിരുന്നു കൈരാന. ക​​ഴിഞ്ഞ മാർച്ചിൽ നടന്ന ലോക്​സഭാ ഉപതെരഞ്ഞെടുപ്പുകളിലും യു.പിയിൽ ബി​.​ജെ.പി തിരിച്ചടി നേരിട്ടിരുന്നു.​ യു.പിയിലെ നൂർപുരിൽ നടന്ന നിയമസഭാ ​ഉപതെരഞ്ഞെടുപ്പിലും ബി.ജെ.പിക്ക്​ സീറ്റ്​ നഷ്​ടമായി.