യു.പിയിൽ ആപ്​ -എസ്​.പി സഖ്യസാധ്യത തള്ളി; മൂന്നാം സ്​ഥാനാർഥി പട്ടിക പ്രഖ്യാപിച്ച്​ ആപ്​

ലഖ്​നോ: 2022ലെ ഉത്തർപ്രദേശ്​ നിയമസഭ തെരഞ്ഞെടുപ്പിൽ സമാജ്​വാദി പാർട്ടിയുമായുള്ള സഖ്യസാധ്യതകൾ തളളി ആം ആദ്​മി പാർട്ടി. സഖ്യസാധ്യത വിദൂരത്താ​യതോടെ 30 പുതിയ സ്​ഥാനാർഥികളെ ഉൾപ്പെടുത്തി മൂന്നാം സ്​ഥാനാർഥി പട്ടിക ആപ്​ പ്രഖ്യാപിച്ചു. ഇതോടെ സ്​ഥാനാർഥി പ്രഖ്യാപനത്തിൽ യു.പിയിൽ മറ്റ്​ പാർട്ടികളെ തള്ളി ഒന്നാം സ്​ഥാനത്തായി ആപ്​.

200 സ്​ഥാനാർഥികളുടെ പട്ടികയാണ്​ ആപ്​ ഇതുവരെ പ്രഖ്യാപിച്ചത്​. സംസ്​ഥാനത്തെ മുഴുവൻ സീറ്റുകളിലും മത്സരിക്കുമെന്ന്​ ആപ്​ യു.പി വക്താവ്​ വൈഭവ്​ മഹേശ്വരി പറഞ്ഞു.

അതേസമയം, ഉത്തരാഖണ്ഡിലെ 70 നിയമസഭ സീറ്റുകളിൽ 44 എണ്ണത്തിലും ആപ്​ സ്​ഥാനാർഥികളെ പ്രഖ്യാപിച്ചു. മുഖ്യമന്ത്രി അരവിന്ദ്​ കെജ്​രിവാൾ ഡൽഹിയിൽ കൊണ്ടുവന്ന മാറ്റം ഇവിടെ കൊണ്ടുവരുമെന്ന്​ ഉത്തരാഖണ്ഡ്​ മുഖ്യമന്ത്രി സ്​ഥാനാർഥി അജയ്​ കോത്തിയാൽ പറഞ്ഞു.

ഇരു സംസ്​ഥാനങ്ങളിലും സർക്കാർ രൂപീകരിക്കാൻ ആയില്ലെങ്കിലും ബി.ജെ.പിയുടെയും കോൺഗ്രസിന്‍റെയും വോട്ടുകളിൽ വിള്ളലുണ്ടാക്കാൻ ആപ്പിനാകുമെന്നാണ്​ നിരീക്ഷകരുടെ വിലയിരുത്തൽ.