മഴഭീതി ഒഴിയാതെ തമിഴ്​നാട്​; വെള്ളക്കെട്ടിന്​ ശമനമില്ല

ചെന്നൈ: മൂന്നു ദിവസമായി തുടരുന്ന മഴയിൽ ചെന്നൈയിലെ പല നഗരങ്ങളും ഇ​പ്പോഴും വെള്ള​ക്കെട്ടിലാണ്​. കരകവിഞ്ഞൊഴുകുന്ന നദികൾ പോലെയാണ്​ ഇപ്പോൾ റോഡുകൾ. റിസർവോയറുകളും നിറഞ്ഞൊഴുകുകയാണ്​. മഴക്കെടുതിയിൽ നാല് പേർ മരിക്കുകയും 60 ലധികം വീടുകൾ തകരുകയും ചെയ്​തു. 16 കന്നുകാലികൾ മരിച്ചിട്ടുണ്ട്​. കഴിഞ്ഞ 24 മണിക്കൂറിനിടെ സംഭവിച്ച ദുരന്തമാണിത്​. ചെന്നൈ, തേനി, മധുര ജില്ലകളിലാണ്​ അപകടം ഏറെയും.

സംസ്ഥാനത്തിന്‍റെ താഴ്​ന്ന ഭാഗങ്ങൾ, ചെന്നൈയിലെ പൂണ്ടി, ചോളവാരം, പുഴൽ, ചെമ്പരമ്പാക്കം, തേർവായ് കണ്ടിഗൈ റിസർവോയറുകൾ, നഗരത്തിൽ നിന്ന് 230 കിലോമീറ്റർ അകലെയുള്ള വീരാണം തടാകം എന്നിവിടങ്ങളിൽ നിന്ന് മിച്ചജലം തുറന്നുവിട്ടു. വുഷ്​ടി പ്രദേശങ്ങളിൽ മഴ തുടരുകയാണ്​.

തമിഴ്‌നാട്ടിലെയും കർണാടകയിലെയും കാവേരി നദിയുടെ വൃഷ്ടിപ്രദേശങ്ങളിൽ കനത്ത മഴ ലഭിച്ചതോടെ അണക്കെട്ടിലേക്കുള്ള നീരൊഴുക്ക് കൂടിയിട്ടുണ്ട്​. കോയമ്പത്തൂർ ജില്ലാ ഭരണകൂടവും വെല്ലൂർ ജില്ലാ അധികൃതരും ജാഗ്രത നിർദേശം പുറപ്പെടുവിച്ചിട്ടുണ്ട്​. ജലസംഭരണികളിൽ നിന്ന് അധികജലം തുറന്നുവിടുന്ന സാഹചര്യത്തിൽ അതത് പ്രദേശങ്ങളിലെ ജനങ്ങൾക്കാണ്​ ജാഗ്രതാ നിർദേശം നൽകിയിരിക്കുന്നത്​.

ചെന്നൈ നഗരത്തിലെ മിക്ക പ്രദേശങ്ങളും ഇപ്പോഴും വെള്ളത്തിനടിയിലാണ്​. സുരക്ഷ കണക്കിലെടുത്ത് പല പ്രദേശങ്ങളിലും വൈദ്യുതി ബന്ധം വിഛേദിച്ചിട്ടുണ്ട്. സിറ്റി പൊലീസ്​ സ്​റ്റേഷൻ അടക്കം താൽക്കാലിക കെട്ടിടത്തിലേക്ക്​ മാറ്റിയിട്ടുണ്ട്​. ചെന്നൈയിലെയും പ്രാന്തപ്രദേശങ്ങളിലെയും ഏതാനും റോഡുകൾ അടച്ചിട്ടിരിക്കുകയാണ്​.

290 പ്രദേശങ്ങളിലാണ്​ കനത്ത വെള്ളക്കെട്ട്​ തുടരുന്നത്​. ഇവിടങ്ങളിൽ വലിയ പമ്പ്​ സെറ്റുകൾ ഉപയോഗിച്ച്​ വെള്ളം ഒഴുക്കി വിടാനുളള ശ്രമങ്ങൾ തുടരുകയാണ്​. 14 റോഡുകളിൽ നിന്ന്​ പൂർണമായും വെള്ളം ഒഴുക്കിക്കളഞ്ഞു. സംസ്​ഥാനത്തെ 34 ജില്ലകളിലാണ്​ കനത്ത മഴ ലഭിച്ചത്​. മത്സ്യത്തൊഴിലാളികൾ നവംബർ ഒമ്പതിനും 12നും ഇടയിൽ മത്സ്യബന്ധനത്തിനായി കടലിൽ പോകരുതെന്ന് നിർദ്ദേശമുണ്ട്​.

മുഖ്യമന്ത്രി എം.കെ സ്റ്റാലിൻ രണ്ട്​ ദിവസമായി ദുരിതാശ്വാസ പ്രവർത്തനങ്ങളിൽ സജീവമായി രംഗത്തുണ്ട്​. വെള്ളം നീന്തി ദുരിത പ്രദേശങ്ങൾ സന്ദർശിക്കുന്ന മുഖ്യമന്ത്രിയുടെ വീഡിയോയും ചിത്രങ്ങളും ഇതിനകം വൈറലായിട്ടുണ്ട്​.