വിവാഹത്തിൽ പ​ങ്കെടുത്ത 87 പേർക്ക്​ കോവിഡ്​; ഒരു ഗ്രാമം മുഴുവൻ ഐസൊലേഷൻ കേന്ദ്രമാക്കി

നിസാമാബാദ്​: തെലങ്കാനയിൽ വിവാഹത്തിൽ പ​ങ്കെടുത്ത 87 അതിഥികൾക്ക്​ കോവിഡ്​. നിസാമാബാദ്​ ജില്ലയിലെ ഹൻമജിപേട്ട്​ ഗ്രാമത്തിലാണ്​ സംഭവം.

370 പേർ വിവാഹത്തിൽ പ​ങ്കെടുത്തതായാണ്​ വിവരം. കൂടുതൽ പേർക്ക്​ കോവിഡ്​ സ്​ഥിരീകരിച്ചതോടെ എല്ലാവരെയും പരിശോധനക്ക്​ വിധേയമാക്കുകയായിരുന്നു. രോഗം സ്​ഥിരീകരിച്ചവരെ​െയല്ലാം വീട്ടുനിരീക്ഷണത്തിലാക്കി. ഗ്രാമത്തിൽ ഒരു ഐസൊലേഷൻ സെന്‍റർ ഒരുക്കുകയും ചെയ്​തു. രോഗികളുമായി സമ്പർക്കത്തിലായവ​െര കണ്ടെത്താനുള്ള ശ്രമത്തിലാണ്​ അധികൃതർ.

തൊട്ടടു​ത്ത ഗ്രാമമായ സിദ്ധപുർ ഗ്രാമത്തിൽനിന്നും നിരവധ​ിപേർ വിവാഹത്തിൽ പ​ങ്കെടുക്കാനെത്തിയിരുന്നു. ഇവിടെയും കൂടുതൽപേർക്ക്​ രോഗം സ്​ഥിരീകരിച്ചതായും അധികൃതർ പറയുന്നുണ്ട്​. നിരവധി ​പേരെ നിസാമാബാദിലെ ജനറൽ ആശുപ​ത്രിയിൽ പ്രവേശിപ്പിച്ചിട്ടുണ്ട്​. സിദ്ധാപൂർ ഗ്രാമത്തിലും ആരോഗ്യവിദഗ്​ധർ കോവിഡ്​ പരിശോധന ക്യാമ്പുകൾ തുടങ്ങി.

കോവിഡ്​ രൂക്ഷമായ മഹാരാഷ്​ട്ര അതിർത്തിയിലാണ്​ നിസാമാബാദ്​ ജില്ല. ഞായറാഴ്ച 96 പേർക്കാണ്​ ജില്ലയിൽ കോവിഡ്​ സ്​ഥിരീകരിച്ചത്​. ഞായറാഴ്ച തെലങ്കാനയിൽ 1097 പേർക്കാണ്​ കോവിഡ്​ സ്​ഥിരീകരിച്ചത്​. നിലവിൽ 8746 പേർ ഇവിടെ ചികിത്സയിലുണ്ട്​.