ആദ്യ മന്ത്രിസഭ യോഗത്തിൽ തന്നെ സി.എ.എക്ക്​​ അനുമതി നൽകും​; ബംഗാളിൽ പ്രകടന പത്രിക പുറത്തിറക്കി ബി.ജെ.പി

കൊൽക്കത്ത: കുടുംബത്തിൽ ഒരാൾക്ക്​ തൊഴിൽ, സാമൂഹിക സുരക്ഷ പദ്ധതികൾ, പൗരത്വ ഭേദഗതി നിയമം നടപ്പാക്കൽ എന്നീ വാഗ്​ദാനങ്ങളോടെ ബംഗാളിൽ ബി.ജെ.പിയുടെ പ്രകടന പത്രിക. അധികാരത്തിൽ വന്നാൽ ആദ്യ മന്ത്രിസഭ യോഗത്തിൽതന്നെ പൗരത്വ ഭേദഗതി നിയമത്തിന്​ അനുമതി നൽകുമെന്ന്​ സാൾട്​ലേക്കിൽ നടന്ന ചടങ്ങിൽ ആഭ്യന്തര മന്ത്രി അമിത്​ ഷാ പുറത്തിറക്കിയ പ്രകടന പത്രികയിൽ പറയുന്നു.

പി.എം കിസാൻ, ആയുഷ്​മാൻ ഭാരത്​ ആരോഗ്യ പദ്ധതി എന്നിവയുടെ ആനുകൂല്യങ്ങൾ ലഭ്യമാക്കുന്ന വിവിധ പദ്ധതികൾ സംസ്​​ഥാനത്ത്​ നടപ്പാക്കും. കർഷകർക്ക്​ വർഷം 10,000 രൂപ നൽകും. 6000 കേന്ദ്രവും 4000 സംസ്​ഥാനവുമാണ്​ നൽകുക. കർഷക ക്ഷേമത്തിനായി 5000 കോടിയും നീക്കിവെക്കും.

'സുവർണ ബംഗാൾ' സാക്ഷാത്​കരിക്കാൻ കല, സംസ്​കാരം, സാഹിത്യം എന്നിവയടക്കമുള്ള മേഖലകൾക്കായി 11,000 കോടിയുടെ ഫണ്ട്​ വകയിരുത്തും. അതിർത്തിയിൽനിന്നുള്ള നുഴഞ്ഞുകയറ്റം തടയാൻ കൃത്യമായ നിരീക്ഷണ സംവിധാനം നടപ്പാക്കുമെന്നും പത്രിക ഉറപ്പു നൽകുന്നു.