കോവിഡ്​ മുക്​തി നേടിയവർ​ മൂന്ന്​ മാസത്തിനുശേഷം വാക്​സിനെടുത്താൽ മതിയെന്ന്​ കേന്ദ്രം

ന്യൂഡൽഹി: കോവിഡിൽനിന്ന്​ മുക്​തി നേടിയവർ മൂന്ന്​ മാസത്തിനുശേഷം വാക്​സിനേഷൻ എടുത്താൽ മതിയെന്ന്​ കേന്ദ്ര സർക്കാർ. ആദ്യ ഡോസ്​ സ്വീകരിച്ചശേഷമാണ്​ കോവിഡ്​ വന്നതെങ്കിൽ, സുഖംപ്രാപിച്ച്​ മൂന്ന്​ മാസം കഴിഞ്ഞിട്ട്​ മതി രണ്ടാമത്തെ കുത്തിവെപ്പ്​.

കോവിഡ്​ ഭേദമായവരിൽ വാക്​സിൻ എടുക്കുന്നതി​െൻറ കാലയളവ്​ സംബന്ധിച്ച്​ ഇതുവരെ കേന്ദ്രം വ്യക്​തമായ മാനദണ്ഡം തയാറാക്കിയിരുന്നില്ല. രോഗിയുടെ നിലയനുസരിച്ച്​ അതാത്​ ഡോക്​ടർമാർ രണ്ട്​ മുതൽ നാല്​ ആഴ്​ച വരെ കാലയളവ്​ നിർദേശിക്കുകയായിരുന്നു പതിവ്​.

നീതി ആയോഗ് അംഗം ഡോ. വി.കെ. പോളി​െൻറ നേതൃത്വത്തിലുള്ള കോവിഡ് വാക്സിൻ അഡ്മിനിസ്ട്രേഷൻ സംബന്ധിച്ച ദേശീയ വിദഗ്ദ്ധ സംഘമായ എൻ‌.ഇ‌.ജി.‌വി.‌സിയുടെ ശുപാർശകൾ പ്രകാരമാണ്​ പുതിയ നിർദേശങ്ങൾ കേന്ദ്രം പുറപ്പെടുവിച്ചത്​. മുലയൂട്ടുന്ന സ്ത്രീകൾക്ക് പ്രതിരോധ കുത്തിവെപ്പ്​ നൽകാനും വിദഗ്​ധ സംഘം ശുപാർശ ചെയ്തിട്ടുണ്ട്.

കോവിഷീൽഡ് വാക്സി​െൻറ രണ്ട് ഡോസുകൾ തമ്മിലുള്ള കാലയളവ്​ ആറ് മുതൽ എട്ട് ആഴ്ചയിൽനിന്ന്​ 12 മുതൽ 16 ആഴ്ച വരെയാക്കി സർക്കാർ ഇൗയിടെ നീട്ടിയിരുന്നു. അതിനുശേഷമാണ് ഇപ്പോൾ പുതിയ നിർദേശങ്ങൾ കൊണ്ടുവരുന്നത്​. കോവിഷീൽഡി​െൻറ കാലയളവ്​ നീട്ടിയതിനെതിരെ കോൺഗ്രസിൽ നിന്നടക്കം വിമർശനങ്ങൾ വന്നിരുന്നു. രൂക്ഷമായ വാക്സിൻ ക്ഷാമത്തി​െൻറ പശ്ചാത്തലത്തിലാണ്​ ഇടവേള നീട്ടിയതെന്നായിരുന്നു ആരോപണം.

കഴിഞ്ഞ മൂന്ന് മാസത്തിനുള്ളിൽ ഇത് രണ്ടാം തവണയാണ് കോവിഷീൽഡ് ഡോസുകൾ തമ്മിലുള്ള ഇടവേള വിപുലീകരിച്ചത്. വാക്‌സിനുകളുടെ ഫലപ്രാപ്തി വർധിപ്പിക്കുമെന്ന്​ ചൂണ്ടിക്കാട്ടി മാർച്ചിലാണ്​ സർക്കാർ 28 ദിവസം മുതൽ ആറ് ആഴ്ച വരെയാക്കിത്​. ഇത്തവണയും അതേ കാരണം പറഞ്ഞാണ്​​ ഇടവേള നീട്ടിയത്​. അതേസമയം, കോവാക്സി​െൻറ ഇടവേളകളിൽ മാറ്റമൊന്നും ശുപാർശ ചെയ്തിട്ടില്ല.