നായ്​ക്കുട്ടിയെ രക്ഷിക്കാൻ ശ്രമിക്കുന്നതിനിടെ ഒമ്പതാം നിലയിൽനിന്ന്​ വീണ്​ 12കാരിക്ക്​ ദാരുണാന്ത്യം

ന്യൂഡൽഹി: ബാൽക്കണിയിൽ കുടുങ്ങിയ നായ്​ക്കുട്ടിയെ രക്ഷിക്കാൻ ശ്രമിക്കുന്നതിനിടെ ഒമ്പതാംനിലയിൽനിന്ന്​ വീണ്​ 12കാരിക്ക്​ ദാരുണാന്ത്യം. ഉത്തർപ്ര​േദശിലെ ഗാസിയാബാദ്​ പ്രദേശത്താണ്​ സംഭവം.

ഏഴാം ക്ലാസ്​ വിദ്യാർഥിനിയായ ജ്യോത്സ്​നയാണ്​ മരിച്ചത്​. വീടിന്‍റെ അകത്തുനിന്ന്​ തന്‍റെ വളർത്തുനായുമായി കളിക്കുകയായിരുന്നു ​പെൺകുട്ടി. ഇതിനിടെ ബാൽക്കണിയിൽ സ്​ഥാപിച്ചിരുന്ന വലയിൽ നായ്​ക്കുട്ടി കുരുങ്ങി. നായ്​ക്കുട്ടിയെ രക്ഷിക്കാൻ ശ്രമിക്കുന്നതിനിടെ ജ്യോത്സനയും നായ്​ക്കുട്ടിയും താഴേക്ക്​ വീഴുകയായിരുന്നു.

മകളുടെ ശബ്​ദം കേട്ട് ബാൽക്കണിയിലെത്തിയ അമ്മ കിരൺ പെൺകുട്ടി രക്തത്തിൽ കുളിച്ചുകിടക്കുന്നതാണ്​ കണ്ടത്​. ഉടൻ തന്നെ കുട്ടിയെ ആശുപത്രിയിലെത്തിച്ചെങ്കിലും മരിച്ചു. നായ്​ക്കുട്ടിയും മരിച്ചിരുന്നു.

തിങ്കളാഴ്ച ഗ്രേറ്റർ നോയിഡയി​ൽ 12ാം നിലയിൽനിന്ന്​ താഴെവീണ്​ ഒരുവയസുകാരൻ മരിച്ചിരുന്നു. ബാൽക്കണിയിലെ ഗ്രില്ലിന്​ ഇടയിലൂടെയാണ്​ കുട്ടി താഴേക്ക്​ വീണത്​.