ഡൽഹിയിലെ ബാബ കാ ധാബയുടെ ഉടമ ആത്​മഹത്യക്ക്​ ശ്രമിച്ചു

ന്യൂഡൽഹി: ഡൽഹിയിലെ പ്രശസ്​തമായ ബാബ കാ ധാബയുടെ ഉടമ കാന്ത പ്രസാദ്​ ആത്​മഹത്യക്ക്​ ശ്രമിച്ചു. ഇദ്ദേഹത്തെ സഫ്​ദർജംഗ്​ ആശുപത്രിയിൽ പ്രവേശിപ്പിച്ചതായി പൊലീസ്​ അറിയിച്ചു. അമിതമായി മദ്യം, ഉറക്ക ഗുളികകൾ എന്നിവ കഴിച്ചാണ്​ ഇദ്ദേഹം ആത്​മഹത്യക്ക്​ ശ്രമിച്ചത്​.

കടയിലിരിക്കെ ഇദ്ദേഹം അബോധാവസ്ഥയിലാവുകയായിരുന്നുവെന്ന്​ ഭാര്യ ബദാമി ദേവി മാധ്യമപ്രവർത്തകരോട് പറഞ്ഞു. 'അദ്ദേഹം എന്താണ് കഴിച്ചതെന്നും എന്താണ് കുടിച്ചതെന്നും എനിക്കറിയില്ല. അബോധാവസ്ഥയിലായതിനെ തുടർന്ന് അദ്ദേഹത്തെ ആശുപത്രിയിലെത്തിച്ചു. ഡോക്ടർമാർ ഞങ്ങളോട് ഒന്നും പറഞ്ഞിട്ടില്ല' -ബദാമി പറഞ്ഞു. എന്നാൽ, പിതാവ്​ അമിതമായി മദ്യവും ഉറക്കുഗുളികളും കഴിച്ചതായി മകൻ കരൺ പൊലീസിനെ അറിയിച്ചു.

കഴിഞ്ഞവർഷമാണ്​ ഇദ്ദേഹത്തിൻെറ തട്ടുകട ജന​ശ്രദ്ധയാകർഷിക്കുന്നത്​. കോവിഡ്​ കാരണം കാന്ത പ്രസാദ്​ വലിയ സാമ്പത്തിക പ്രതിസന്ധിയിലായിരുന്നു. ഇദ്ദേഹത്തിൻെറ കണ്ണീരണിഞ്ഞുള്ള വിഡിയോ ഏറെ വൈറലായിരുന്നു. പ്രായമായ ദമ്പതികളുടെ വിഡിയോ യൂട്യൂബർ ഗൗരവ് വാസൻ പോസ്റ്റ് ചെയ്​തശേഷം രാജ്യത്തിൻെറ വിവിധ ഭാഗങ്ങളിൽനിന്ന്​ സംഭാവന വന്നിരുന്നു.

ഒറ്റരാത്രികൊണ്ട് സമ്പന്നനായ കാന്ത പ്രസാദ് പുതിയ റെസ്​റ്റോറൻറ്​ തുറന്നെങ്കിലും കച്ചവടം ഇല്ലാത്തതിനെ തുടർന്ന്​ പൂട്ടി. തുടർന്ന്​ ഇവർ പഴയ ധാബയിലേക്ക്​ തന്നെ മടങ്ങി.

തൻെറ വരുമാനത്തിൽ 20 ലക്ഷം ബാക്കിയുണ്ടെന്നും ജീവിച്ചിരിക്കുന്നതുവരെ തട്ടുകട പ്രവർത്തിപ്പിക്കുമെന്നും അദ്ദേഹം പറഞ്ഞിരുന്നു. തനിക്ക്​ വന്ന പൈസ ഗൗരവ്​ വാസവൻ തട്ടിയെടുത്തെന്നും​ അദ്ദേഹം ആരോപിച്ചിരുന്നു. എന്നാൽ, കഴിഞ്ഞദിവസം ഈ പ്രസ്​താവനയിൽ കാന്ത പ്രസാദ്​ ഗൗരവിനോട്​ ക്ഷമ ചോദിച്ചിരുന്നു.