ഡൽഹി കലാപം: ഗുൽഫിഷ ഫാത്തിമ സമർപ്പിച്ച ജാമ്യ ഹരജി പരിഗണിക്കാതെ സുപ്രീംകോടതി; ഡൽഹി ഹൈകോടതി കേൾക്കണമെന്ന് നിർദേശം

ന്യൂഡ​ൽ​ഹി: ഡൽഹി ക​ലാ​പ​ക്കേ​സി​ൽ പ്ര​തി​യാ​ക്കി പൊലീസ് യു.​എ.​പി.​എ ചു​മ​ത്തി​യ പി​ഞ്ച്​​റ തോ​ഡ്​ പ്ര​വ​ർ​ത്ത​ക​ ഗു​ൽ​ഫി​ഷ ഫാ​ത്തി​മ​യു​ടെ ആർട്ടിക്ക്ൾ-32 പ്രകാരമുള്ള ​ജാമ്യാപേക്ഷ സുപ്രീംകോടതി പരിഗണിച്ചില്ല. അതേസമയം, ഫാത്തിമയുടെ ജാമ്യാപേക്ഷ അടുത്ത വാദം കേൾക്കുന്ന തീയതിയിൽ പരിഗണിക്കണമെന്ന് ജസ്റ്റിസുമാരായ ബേല എം. ത്രിവേദി, സതീഷ് ചന്ദ്ര ശർമ്മ എന്നിവരടങ്ങിയ ബെഞ്ച് ഡൽഹി ഹൈകോടതിയോട് ആവശ്യപ്പെട്ടു. വ​ട​ക്കു കി​ഴ​ക്ക​ൻ ഡ​ൽ​ഹി​യി​ൽ ശാ​ഹീ​ൻ​ബാ​ഗ്​ മാ​തൃ​ക​യി​ൽ പൗ​ര​ത്വ സ​മ​ര​ത്തി​ന്​ നേ​തൃ​ത്വം ന​ൽ​കി​യ​തി​നാ​ണ്​ ഗു​ൽ​ഫി​ഷ​ ഫാത്തിമക്കെ​തി​രെ കേ​സെ​ടു​ത്ത​ത്.

2020 ഏപ്രിൽ 11ന് ഡൽഹി പൊലീസ് അവരെ അറസ്റ്റ് ചെയ്തു. അന്നുമുതൽ അവർ ജയിലിലാണ്. ജെ.എൻ.യു മുൻ വിദ്യാർഥി നേതാവ് ഉമർ ഖാലിദ്, യുനൈറ്റഡ് എഗെയ്ൻസ്റ്റ് ഹേറ്റ് നേതാവ് ഖാലിദ് സെയ്ഫി, കോൺഗ്രസ് മുൻ കൗൺസിലർ ഇസ്രത്ത് ജഹാൻ, ആം ആദ്മി പാർട്ടി മുൻ കൗൺസിലർ താഹിർ ഹുസൈൻ എന്നിവർക്കൊപ്പം ഫാത്തിമക്കും കുറ്റപത്രം സമർപ്പിക്കുകയായിരുന്നു.

ആർ.ജെ.ഡി യുവജന വിഭാഗത്തിലെ മീരാൻ ഹൈദർ, പി​ഞ്ച്​​റ തോ​ഡ്​ പ്രവർത്തകരായ സഫൂറ സർഗാർ, നടാഷ നർവാൾ, ദേവാംഗന കലിത, തസ്‍ലിം അഹമ്മദ് എന്നിവരും അറസ്റ്റിലായിരുന്നു.

ഇന്ത്യൻ ശിക്ഷാ നിയമത്തിലെ നിരവധി വകുപ്പുകളും നിയമവിരുദ്ധ പ്രവർത്തനങ്ങൾ തടയൽ നിയമവും (യു.എ.പി.എ) അവർക്കെതിരെ ചുമത്തിയിട്ടുണ്ട്. ജാമ്യം നിഷേധിച്ചതിനെ ചോദ്യം ചെയ്ത് ഫാത്തിമ സമർപ്പിച്ച അപ്പീലിൽ ഡൽഹി ഹൈകോടതി 2022 മേയിൽ ഡൽഹി സർക്കാരിന് നോട്ടീസ് അയച്ചു.

എന്നാൽ, പിന്നീട് ഇതുവരെ തീരുമാനമായിട്ടില്ല. തുടർന്ന് ആർട്ടിക്കിൾ 32 പ്രകാരമുള്ള റിട്ട് ഹരജിയിലൂടെ ഫാത്തിമ സുപ്രീംകോടതിയെ സമീപിക്കുകയായിരുന്നു. ജാമ്യാപേക്ഷയിൽ ഹൈക്കോടതി തീരുമാനമെടുത്തിട്ടില്ലെന്നും വിചാരണ പുരോഗമിച്ചിട്ടില്ലെന്നും ഫാത്തിമയ്ക്ക് വേണ്ടി ഹാജരായ മുതിർന്ന അഭിഭാഷകൻ കപിൽ സിബൽ പറഞ്ഞു.