കീഴ്​കോടതികളിൽ 5180 ജഡ്ജിമാരുടെ തസ്തികകൾ ഒഴിഞ്ഞുകിടക്കുന്നു

ന്യൂഡൽഹി: രാജ്യത്തെ കീഴ്​കോടതികളിൽ 5180 ജഡ്ജിമാരുടെ തസ്തികകൾ ഒഴിഞ്ഞുകിടക്കുന്നുണ്ടെന്ന്​ കേന്ദ്ര നിയമ നീതി മ​ന്ത്രി കിരൺ റിജിജു. ആ തസ്​തികകൾ നികത്തേണ്ടത്​ ഹൈകോടതികളും സംസ്ഥാന പബ്ലിക് സർവീസ് കമീഷനുകളുമാണെന്നും കേന്ദ്ര നിയമ-നീതി മന്ത്രി ശ്രീ കിരൺ റിജിജു വ്യക്തമാക്കി. 1106 ജഡ്ജിമാരുടെ തസ്തികകൾ ഒഴിഞ്ഞുകിടക്കുന്ന ഉത്തർപ്രദേശിലാണ് ഏറ്റവും കൂടുതൽ ഒഴിവുകളുള്ളത്. പിന്നാലെ ബിഹാറും (569) മധ്യപ്രദേശും (476) ഉം ഉണ്ട്​.

കോടതികൾക്ക് ആവശ്യമായ അടിസ്ഥാന സൗകര്യങ്ങൾ ഒരുക്കുന്നതിന് നാഷണൽ ജുഡീഷ്യൽ ഇൻഫ്രാസ്ട്രക്ചർ അതോറിറ്റി രൂപീകരിക്കുന്നതിന് ചീഫ് ജസ്റ്റിസിന്റെ നിർദ്ദേശം സർക്കാരിന് ലഭിച്ചിട്ടുണ്ടെന്നും മുസ്ലീം ലീഗ്​ എം.പി പി.വി അബ്ദുൽ വഹാബിന്‍റെ ചോദ്യത്തിന്​ മറുപടിയായി മന്ത്രി അറിയിച്ചു.

കീഴ്‌കോടതികളുടെ അടിസ്ഥാന സൗകര്യ വികസനത്തിന്‍റെ പ്രാഥമിക ഉത്തരവാദിത്തം സംസ്ഥാന സർക്കാരിനാണ്​. സംസ്ഥാന സർക്കാറിനാവശ്യമായ വിഭവങ്ങൾ വർധിപ്പിക്കുന്നതിന്​ കേന്ദ്രാവിഷ്‌കൃത പദ്ധതി നടപ്പാക്കുന്നുണ്ട്​. 2014-2015 മുതൽ കേന്ദ്ര സർക്കാർ ഇൗയിനത്തിൽ 5565 കോടി രൂപ അനുവദിച്ചുവെന്നും, 2021ലെ ബജറ്റിൽ 5307 കോടി രൂപ കേന്ദ്ര സർക്കാർ വകയിരുത്തിയിട്ടുണ്ടെന്നും മന്ത്രി തുടർന്നു.