തമിഴ്​നാട്ടിലെ സർക്കാർ ആശുപത്രിയിൽ എക്​സ്​റേ റിപ്പോർട്ട്​ നൽകുന്നത്​ പേപ്പറിൽ

ചെന്നൈ: തമിഴ്​നാട്ടിലെ കോവിൽപട്ടി സർക്കാർ ആശുപത്രിയിൽ എക്​സ്​റേ റി​േപ്പാർട്ട്​ നൽകുന്നത്​ പേപ്പറിൽ. എക്​സ്​റേ ഫിലിമുകൾക്ക്​ വൻ വിലയാണെന്നും വാങ്ങാൻ ഫണ്ടില്ലെന്നും ചൂണ്ടിക്കാട്ടിയാണ്​ നടപടി.

ഒരു മാസത്തോളമായി എക്​സ്​റേ റിപ്പോർട്ടുകൾ പേപ്പറിലാണ്​ നൽകുന്നതെന്ന്​ രോഗികളും ബന്ധുക്കളും പറയുന്നു. എക്​സ്​റേ റിപ്പോർട്ട്​ പേപ്പറിൽ നൽകുന്നതിനാൽ ശരിയായ ചികിത്സ ലഭ്യമാക്കാൻ സാധിക്കുന്നില്ലെന്നും അവർ പറയുന്നു.

സർക്കാർ ആശുപത്രിയിൽ എക്​സ്​റേ ഫിലിമിൽ റിപ്പോർട്ടുകൾ നൽകുന്നതിന്​ 50 രൂപ നൽകണം. പേപ്പറിലാണെങ്കിൽ അധിക തുക നൽകണ്ട.

പേപ്പറുകളിൽ എക്​സ​്​റേ റിപ്പോർട്ടുകൾ നൽകുന്നതും ഫിലിമുകളിൽ നൽകുന്നതും തുല്യമാണെന്നും ഇത്​ സാധാരണയായി നൽകാറുണ്ടെന്നും തൂത്തുക്കുടി മെഡിക്കൽ കോളജ്​ ആശുപത്രി ഡീൻ ഡോ. നെഹ്​റു പറഞ്ഞു.

എക്​സ്​റേ ഷീറ്റുകൾ ടെൻഡർ ചെയ്യുന്നതിലെ ചില പ്രശ്​നങ്ങൾ കാരണം എക്​സ്​റേ ഫിലിമുകൾ ലഭ്യമല്ലെന്ന്​ കോവിൽപട്ടി സർക്കാർ ആശുപത്രിയിലെ ​മെഡിക്കൽ സൂപ്രണ്ട്​ ഡോ. കമലവാസൻ പറഞ്ഞു. ഇവക്ക്​ ദൗർലഭ്യമുള്ളതിനാൽ മെഡിക്കൽ-ലീഗൽ കേസുകളിൽ മാത്രം അവ ലഭ്യമാക്കാൻ തീരുമാനിച്ചതായും അദ്ദേഹം പറഞ്ഞു.

കൂടാതെ ബന്ധപ്പെട്ട ഡോക്​ടർമാർക്ക്​ ഡിജിറ്റൽ എക്​സ്​റേ ഫലങ്ങൾ വാട്​സ്​ആപ്​ ചെയ്​ത്​ നൽകാറുണ്ടെന്നും രോഗികൾക്ക്​ മാത്രമാണ്​ പേപ്പറുകളിൽ നൽകുന്നതെന്നും അദ്ദേഹം പറഞ്ഞു.