അംബാനിക്കു ഭീഷണി; പരംബീറിനു പിന്നാലെ ഏറ്റുമുട്ടൽ വിദഗ്​ദൻ പ്രദീപ്​ ശർമയെയും ചോദ്യം ചെയ്യുന്നു

മുംബൈ: അസിസ്​റ്റൻറ്​ ഇൻസ്​പെക്​ടർ സച്ചിൻ വാസെ അറസ്​റ്റിലായ അംബാനി ഭീഷണി, മൻസുഖ്​ ഹിരേൻ കേസുകളിൽ മുൻ മുംബൈ പൊലീസ്​ കമിഷണർ പരംബീർ സിങ്ങിനെയും 'ഏറ്റുമുട്ടൽ വിദഗ്​ദനും' മുൻ സീനിയർ ഇൻസ്​പെക്​ടറുമായ പ്രദീപ്​ ശർമയെയും എൻ.െഎ.എ ചോദ്യം ചെയ്യുന്നു. ഇരുവരെയും എൻ.െഎ.എ കാര്യാലയത്തിൽ വിളിച്ചുവരുത്തിയാണ്​ ചോദ്യം ചെയ്യൽ. രാവിലെ 9.30 ന്​ ഹാജറായ പരംബീറിനെ നാല്​ മണിക്കൂർ ചോദ്യം ചെയ്​ത ശേഷം വിട്ടയച്ചു. കേസിൽ അറസ്​റ്റിലായ മുൻ അസിസ്​റ്റൻറ്​ ഇൻസ്​പെക്​ടർ സച്ചിൻ വാസെ പരംബീർ സിങ്ങിന്‍റെയും പ്രദീപ്​ ശർമയുടെയും വിശ്വസ്​തനാണ്​.

പ്രദീപ്​ ശർമ മേധാവിയായിരിക്കെ ആൻറി എക്​സ്​റ്റോർഷൻ സെല്ലിൽ സച്ചിൻ വാസെയുമുണ്ടായിരുന്നു. 300 ലേറെ ഏറ്റുമുട്ടൽ കൊലകൾക്ക്​ പ്രദീപ്​ ശർമ നേതൃത്വം നൽകി. ഇതിൽ 63 എണ്ണത്തിൽ സച്ചിൻ വാസെയും ഭാഗമായിരുന്നു. ഘാട്​കൂപ്പർ സ്​ഫോടന കേസിൽ അറസ്​റ്റിലായ ഖ്വാജ യൂനുസിന്‍റെ കസ്​റ്റഡി മരണ കേസിൽ അറസ്​റ്റിലായി സച്ചിൻ വാസെയും അധോലോക നേതാവ്​ ലഗൻ ബയ്യ വ്യാജ ഏറ്റുമുട്ടൽ കേസിൽ പ്രതിയായി പ്രദീപ്​ ശർമയും സസ്​പെൻഷനിലായിരുന്നു. ഇരുവരെയും സർവീസിൽ തിരിച്ചുകൊണ്ടു വന്നത്​ പരംബീർ സിങ്ങ്​ അധ്യക്ഷനായ സമിതിയാണെന്നാണ്​ ആരോപണം. 2019 ൽ രാജിവെച്ച്​ പ്രദീപ്​ ശർമ ശിവസേന ടിക്കറ്റിൽ നല്ലസൊപാര നിയമസഭ മണ്ഡലത്തിൽ മത്​സരിച്ചപ്പോൾ പ്രചാരണത്തിന്​ ചുക്കാൻ പിടിച്ചത്​ സച്ചിനായിരുന്നു.

കഴിഞ്ഞ ജൂണിലാണ്​ സച്ചിൻ വാസെയെ സർവീസിൽ തിരിച്ചെടുത്തത്​. മുതിർന്ന ഉദ്യോഗസ്​ഥരെ മറികടന്ന്​ ക്രൈം ഇൻറലിജൻസ്​ യൂണിറ്റി (സി.െഎ.യു)ന്‍റെ ചുമതലയാണ്​ സച്ചിന്​ പരംബീർ സിങ്ങ്​ നൽകിയത്​. അർണബ്​ ഗോസ്വാമി പ്രതിയായ അൻവെ നായിക്​ ആത്​മഹത്യ, ടി.ആർ.പി തട്ടിപ്പ്​ കേസുകളുടെയും നടി കങ്കണ റണാവത്തിന്​ എതിരായ നടൻ ഋതിക്​ റോഷന്‍റെ വ്യാജ ഇ–മെയിൽ കേസിന്‍റെയും അന്വേഷണ ചുമതല സച്ചിനാണ്​ നൽകിയത്​. ഫെബ്രുവരി 25 ന്​ മുകേഷ്​ അംബാനിയുടെ വീടിനടുത്ത്​ സ്​ഫോടക വസ്​തുക്കളുമായി സ്​കോർപിയൊ കണ്ടെത്തിയ കേസും ആദ്യം സച്ചിനെ ഏൽപിച്ചിരുന്നു.

സമാന്തര അന്വേഷണവുമായി മഹാരാഷ്​ട്ര എ.ടി.എസ്​ രംഗത്തെത്തിയതോടെയാണ്​ അംബാനി ഭീഷണി കേസിൽ സച്ചിന്‍റെ പങ്ക്​ വ്യക്​തമാകുന്നത്​. പിന്നീട്​​ കേസ്​ മഹാരാഷ്​ട്ര സർക്കാർ ഒൗദ്യോഗികമായി എ.ടി.എസിന്​ കൈമാറുകയും അവരത്​ ഏറ്റെടുക്കും മുമ്പ്​ കേന്ദ്ര സർക്കാർ കേസ്​ എൻ.െഎ.എക്ക്​ വിടുകയും ചെയ്​തു. ഇതോടെ ഭയന്ന സച്ചിനും സംഘവും സ്​കോർപിയൊ ഉടമ മൻസുഖ്​ ഹിരേനെ കൊലപ്പെടുത്തിയെന്നാണ്​ എ.ടി.എസിന്‍റെ കണ്ടെത്തൽ.

പരംബീർ സിങ്ങുമായി ബന്ധപ്പെട്ട പൊലിസ്​ ഉദ്യോഗസ്​ഥരെ ചുറ്റിപ്പറ്റിയാണ്​ എൻ.െഎ.എയുടെ അന്വേഷണം. തിങ്കളാഴ്​ച ഡി.സി.പി റാങ്കിലുള്ള ഉദ്യോഗസ്​ഥനെ എൻ.െഎ.എ ചോദ്യം ചെയ്​തിരുന്നു. മാർച്ച്​ മൂന്നിന്​ സി.െഎ.യു ഒാഫീസിൽ വെച്ച്​ മൻസുഖ്​ ഹിരേനെ കുറ്റമേറ്റെടുക്കാൻ നിർബന്ധിക്കുമ്പോൾ അവിടെ ഉണ്ടായിരുന്ന ഡി.സി.പിയെയാണ്​ ചോദ്യം ചെയ്​തത്​. മാർച്ച്​ നാലിന്​ രാത്രിയാണ്​ മൻസുഖ്​ കൊല്ലപ്പെട്ടത്