പുൽവാമയിൽ സന്തോഷം പ്രകടിപ്പിച്ച്​ അർണബ്​, ബാലാക്കോട്ട്​ നേരത്തേ അറിഞ്ഞു; പുറത്തായ ചാറ്റുകൾ പറയുന്നത്​

ടി.വി അവതാരകൻ അർണബ്​ ഗോസ്വാമിയും ടെലിവിഷൻ റേറ്റിങ്​ കമ്പനിയായ ബാർക്​ സി.ഇ.ഒയ​ും തമ്മിലുള്ള വാട്​സ്​ആപ്പ്​ ചാറ്റുകളിൽ പുറത്തുവരുന്നത്​ ഞെട്ടിക്കുന്ന വിവരങ്ങൾ. പുൽവാമയിൽ നടന്ന രാജ്യത്തിനെതിരായ ഭീകരാക്രമണത്തിൽ വലിയ സന്തോഷമാണ്​ അർണബ്​ പ്രകടിപ്പിക്കുന്നത്​. പുൽവാമ ഭീകരാക്രമണത്തെകുറിച്ച്​ 'വലിയ വിജയം' എന്നാണ്​ ബാർക് മുൻ ചീഫ് എക്സിക്യൂട്ടീവ് ഓഫീസർ പാർത്തോ ദാസ് ഗുപ്തയോട്​ അർണബ്​ പറയുന്നത്​. 'നമ്മൾ ഇത്തവണ വിജയിക്കും' എന്നും പുൽവാമ ആക്രമണം അറിഞ്ഞ അർണബ്​ ആവേശത്തോടെ പ്രതികരിക്കുന്നുണ്ട്​.

ചാവേർ ബോംബർ ഓടിച്ച കാർ സൈന്യം സഞ്ചരിച്ച ബസ്സിലേക്ക് ഇടിച്ചുകയറ്റിയുണ്ടായ സ്​ഫോടനത്തിൽ 40 പട്ടാളക്കാരാണ്​ വീരമൃത്യുവരിച്ചത്​. പുൽവാമക്ക്​ തിരിച്ചടിയായി ഇന്ത്യൻ സൈന്യം രഹസ്യമായി നടത്തിയ ബാലാക്കോട്ട്​ ആക്രമണം മൂന്ന്​ ദിവസംമുമ്പുതന്നെ അർണബ്​ അറിഞ്ഞിരുന്നതായും ചാറ്റുകൾ സൂചിപ്പിക്കുന്നു. ബാലകോട്ട് ആക്രമണത്തിന് മൂന്ന് ദിവസം മുമ്പ് വാട്‌സ്ആപ്പ് ചാറ്റിൽ 'വലിയ എന്തെങ്കിലും സംഭവിക്കും' എന്ന് അർണബ് പറയുന്നുണ്ട്​. 'സാധാരണ ഉള്ളതിനേക്കാൾ വലുത്​ സംഭവിക്കും' എന്നാണ്​ അർണബ്​ പാർത്തോദാസിനോട്​ പറയുന്നത്​.

2019 ഫെബ്രുവരി 23ന് നടന്ന വാട്​സാപ്പ് ചാറ്റിലാണിത്​ പറയുന്നത്​. മൂന്ന് ദിവസത്തിന് ശേഷം, 2019 ഫെബ്രുവരി 26 ന് ഇന്ത്യൻ വ്യോമസേന പാകിസ്താൻ പട്ടണമായ ബാലകോട്ടിൽ ജയ്ഷെ മുഹമ്മദ് പരിശീലന ക്യാമ്പിനുനേരേ ആരകമണം നടത്തി. 2019 ഫെബ്രുവരി 14ന് ജമ്മു കശ്മീരിലെ പുൽവാമയിൽ നടന്ന ആക്രമണത്തോടുള്ള ഇന്ത്യയുടെ പ്രതികരണമായിരുന്നു ഈ ആക്രമണം.

രാജ്യത്ത്​ ഉടൻ 'വലിയ എന്തെങ്കിലും സംഭവിക്കും' എന്ന അർണബിന്‍റെ പരാമർശത്തോട്​ 'ദാവൂദ്' എന്നാണ്​ പാർത്തോ ദാസ്​ ​സംശയരൂപത്തിൽ ചോദിക്കുന്നത്​.

അർനബ് ഗോസ്വാമി: 'ഇല്ല സർ പാകിസ്ഥാൻ. പ്രധാനമായ എന്തെങ്കിലും ഇത്തവണ നടക്കും'

പാർത്തോ ദാസ് ഗുപ്ത: 'കൊള്ളാം'

പാർത്തോ ദാസ് ഗുപ്ത: 'ഈ സീസണിൽ 'വലിയ മനുഷ്യന്' ഇത്​ നല്ലതാണ്​'​

പാർത്തോ ദാസ് ഗുപ്ത: 'അപ്പോൾ അദ്ദേഹം തെരഞ്ഞെടുപ്പ്​ തൂത്തുവാരും'

പാർത്തോ ദാസ് ഗുപ്ത: 'സാധാരണ ആക്രമണമായിരിക്കുമോ'​?

അർനബ് ഗോസ്വാമി: സാധാരണ ആക്രമണത്തിനേക്കാൾ വളരെ വലുത്.

വാട്​സ്​ആപ്പ്​ ചാറ്റുകൾ പുറത്തുവന്നതോടെ നിരവധി അന്തർനാടകങ്ങൾക്കാണ്​ ചുരുളഴിയുന്നത്​. ബി.ജെ.പിയുമായും പ്രധാനമന്ത്രിയുടെ ഓഫീസുമായും അർണബിന്‍റെ വ്യക്​തിബന്ധങ്ങളും ചാറ്റുകളിൽ വ്യക്​തമാണ്​. തന്‍റെ ചാനലിന്‍റെ റേറ്റിങ്​ വർധിപ്പിക്കാനായാൽ പ്രധാമന്ത്രിയുടെ ഓഫീസിൽ നിന്നുള്ള സഹായം ലഭ്യമാക്കാമെന്നാണ്​ അർണബ്​ ബാർക് മുൻ ചീഫ് എക്സിക്യൂട്ടീവ് ഓഫീസർ പാർത്തോ ദാസ് ഗുപ്തയോട്​ പറയുന്നത്​. അങ്ങിനെയെങ്കിൽ പ്രധാനമന്ത്രിയുടെ മാധ്യമ ഉപദേഷ്​ടാവിന്‍റെ സ്​ഥാനം തനിക്ക്​ വാങ്ങിനൽകണമെന്ന്​ പാർത്തോ ദാസ്​ ആവ​ശ്യപ്പെടുന്നു.