ടിക്​ടോക്​ താരം ഡൽഹിയിൽ വെടിയേറ്റ്​ മരിച്ചു

ന്യൂഡൽഹി: വിഡിയോ ആപ്പായ ടിക്​ടോക്കിലൂടെ ശ്രദ്ധേയനായ ഡൽഹി സ്വദേശി അജ്ഞാതരായ മൂന്നംഗ സംഘത്തിൻെറ വെടിയേറ്റ് ​ മരിച്ചു. ടിക്​ടോക്കിൽ അഞ്ച്​ ലക്ഷം പേർ പിന്തുടരുന്ന മോഹിത്​ മോർ(24) ആണ്​ വെടിയേറ്റ്​ മരിച്ചത്​. ഫിറ്റ്​നസ് ​ ട്രെയിനർ കൂടിയായ ഇയാൾ ടിക്​ടോക്കിലും ഇൻസ്​റ്റഗ്രാമിലും സ്ഥിരമായി വിഡിയോകൾ ചിത്രീകരിച്ച്​ ഇടാറുണ്ടായിരുന്നു.

നജഫ്​ഗഢിലെ ജിമ്മിൽ പോവാറുണ്ടായിരുന്ന മോഹിത്​ ഇതിന്​ സമീപത്തുള്ള ഫോ​ട്ടോസ്​റ്റാറ്റ്​ കടയിൽ ഒരു സുഹൃത്തിനെ കാണാനായെത്തിയപ്പോഴായിരുന്നു വെടിയേറ്റത്​. കടയിലെ സോഫയിൽ ഇരുന്ന്​ സുഹൃത്തുമായി സംസാരിക്കുകയായിരുന്നു ഇയാൾ​. ഈ സമയം ഇരുചക്രവാഹനത്തിലെത്തിയ മൂന്ന്​ പേർ കടയിലേക്ക്​ എത്തുകയും മോഹിതിന്​ നേരെ നിറയൊഴിക്കുകയായിരുന്നു. വെടിയേറ്റ്​ സോഫയിലേക്ക്​ വീണ മോഹിത്തിനെ സമീപത്തുള്ള ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

വെടിയുതിർത്ത ശേഷം തിരിച്ച്​ പോകുന്ന അക്രമികളുടെ ദൃശ്യങ്ങൾ സി.സി.ടി.വിയിൽ പതിഞ്ഞിട്ടുണ്ട്​. രണ്ട്​ പേർ ഹെൽമറ്റ്​ ഉപയോഗിച്ച്​ മുഖം മറച്ചിട്ടുണ്ട്​. എന്നാൽ ഒരാ​ളുടെ മുഖം വ്യക്തമായി കാണാം​. കൊലപാതകത്തിന്​ പിന്നിൽ വ്യക്തിവിരോധമോ സാമ്പത്തികപരമായ തർക്കമോ ആകാമെന്നാണ്​ പൊലീസിൻെറ പ്രാഥമിക നിഗമനം. മോഹിത്തിൻെറ ടിക്​ടോക്, ഇൻസ്​റ്റഗ്രാം ​അക്കൗണ്ടുകളും അതിൽവന്ന കമൻറുകളും ​പരിശോധിക്കുമെന്ന്​ പൊലീസ്​ പറഞ്ഞു. സംഭവത്തിൽ പൊലീസ്​ കേസെടുത്ത്​ അന്വേഷണം ഉൗർജ്ജിതമാക്കിയിട്ടുണ്ട്​.