നടന്നു ക്ഷീണിച്ചുറങ്ങിയ ജീവനുകൾ ചതച്ചരച്ച്​ ആ ചരക്കുതീവണ്ടി...

മുംബൈ: വറുതിക്കും ദുരിതങ്ങൾക്കുമിടയിൽ എങ്ങനെയെങ്കിലും സ്വന്തം നാട്ടിലെത്തിച്ചേരുകയെന്ന ആഗ്രഹവുമായി ഇറങ്ങിത്തിരിച്ച ആ അന്തർ സംസ്​ഥാന തൊഴിലാളികളുടെ ദാരുണ മരണം രാജ്യത്തി​​​െൻറയാകെ നൊമ്പരമാവുകയാണ്​. മഹാരാഷ്​ട്രയിൽനിന്ന്​ കിലോമീറ്ററുകൾക്കപ്പുറം മധ്യപ്രദേശിലുള്ള വീട്ടിലേക്ക്​ നടന്നി​ട്ടെങ്കിലും എത്തിച്ചേരാൻ കൊതിച്ച 15 പേരാണ്​ റെയിൽവേ ട്രാക്കിൽ ട്രെയിൻ കയറി മരിച്ചത്​. വീടണയണമെന്ന നിർധന തൊഴിലാളികളുടെ ആഗ്രഹങ്ങൾക്കുനേരെ പുറംതിരിഞ്ഞുനിൽക്കുന്ന അധികാരികളുടെ കണ്ണുതുറപ്പിക്കാൻ പോന്നതു കൂടിയാണ്​ ഈ ദാരുണ മരണങ്ങൾ.

കോവിഡ്​ ​ബാധയെ തുടർന്ന്​ പൊടുന്നനെ ലോക്​ഡൗൺ പ്രഖ്യാപിച്ചതോടെയാണ്​ മറ്റു പലരെയുംപോലെ ആ അന്തർ സംസ്​ഥാന തൊഴിലാളികളും മഹാരാഷ്​ട്രയിൽ കുടുങ്ങിയത്​. ജോലിയുമില്ലാതായതോടെ ജീവിതം ദുരിതപൂർണമായ അവസ്​ഥയിലാണ്​ നടന്നാണെങ്കിലും നാട്ടിലെത്തുകയെന്ന സാഹസത്തിന്​ അവർ മുതിർന്നത്​. മഹാരാഷ്​ട്രയിലെ ജൽനയിൽനിന്ന്​ സംസ്​ഥാനത്തിനകത്തുതന്നെയുള്ള ഭ​ു​സാവാളിലേക്കാണ്​ അവർ ആദ്യം യാത്ര തുടങ്ങിയത്​. 157 കിലോമീറ്ററാണ്​ ഈ രണ്ടു സ്​ഥലങ്ങൾക്കിടയിലുള്ള ദൂരം. അവിടുന്ന്​ സ്വദേശമായ മധ്യപ്രദേശിലെ ഉമാരിയ, ഷാദോൽ എന്നീ സ്​ഥലങ്ങളിലേക്ക്​ ഏതുവിധേനയെങ്കിലും എത്തിച്ചേരുകയായിരുന്നു തൊഴിലാളികളുടെ ഉദ്ദേശ്യം. ഏകദേശം 850 കിലോമീറ്റർ ദൂരമാണ്​ ജൽനയിൽനിന്ന്​ മധ്യപ്രദേശിലെ അവരുടെ ഗ്രാമങ്ങളിലേക്കുള്ളത്​. 

വ്യാഴാഴ്​ച രാവിലെ ഏഴുമണിയോടെയാണ്​ ജൽനയിൽനിന്ന്​ അവർ നടത്തം തുടങ്ങിയത്​. ആദ്യം റോഡിലൂടെ നടന്ന അവർ പിന്നീടത്​​ റെയിൽവേ ട്രാക്കിലൂടെയാക്കി. 36 കിലോമീറ്റിലധികം ദൂരം പിന്നിട്ടതോടെ ക്ഷീണിതരായ തൊഴിലാളികൾ അൽപം വിശ്രമിക്കാൻ തീരുമാനിക്കുകയായിരുന്നു. കർണാഡ്​, ബദ്​നാപൂർ റെയിൽവേ സ്​റ്റേഷനുകൾക്ക്​  ഇടയിലുള്ള ട്രാക്കിലായിരുന്നു അവര​േപ്പാൾ. ക്ഷീണിതരായി ട്രാക്കിലിരുന്ന തൊഴിലാളികൾ വൈകാതെ ഉറക്കത്തിലേക്ക്​ വഴുതിവീണു.

ഉറങ്ങിക്കൊണ്ടിരുന്ന തൊഴിലാളികൾക്കുമേൽ പുലർച്ചെ 5.22നാണ്​ ആ ഗുഡ്​സ്​ ട്രെയിൻ പാഞ്ഞുകയറിയത്​. ഗാഢനിദ്രയിലായതിനാൽ ട്രെയിൻ വരുന്ന ശബ്​ദം കേട്ട്​ ഞെട്ടിയുണരാൻ അവർക്ക്​ കഴിഞ്ഞിട്ടുണ്ടാവില്ല. തൊട്ടുമുന്നിലെത്തിയപ്പോഴാണ്​ തൊഴിലാളികൾ ട്രാക്കിൽ കിടക്കുന്നത്​ കണ്ടതെന്നും എന്നാൽ, പെ​ട്ടെന്ന്​ നിർത്താൻ കഴിഞ്ഞില്ലെന്നും ഡ്രൈവർ പറഞ്ഞതായി റെയിൽവേ മന്ത്രാലയം വിശദീകരിക്കുന്നു.