തമിഴ്‌നാട്ടില്‍ അറസ്​റ്റിലായ കാര്‍ട്ടൂണിസ്​റ്റിന് ജാമ്യം

ചെന്നൈ: തിരുനെല്‍വേലിയില്‍ കുടുംബം കൂട്ട ആത്മഹത്യചെയ്ത സംഭവത്തില്‍ മുഖ്യമന്ത്രിയേയും കലക്​ടറെയും പൊലീസ്​ കമീഷണറെയും  വിമര്‍ശിച്ച് കാര്‍ട്ടൂണ്‍ വരച്ചതിന് അറസ്​റ്റിലായ കാര്‍ട്ടൂണിസ്​റ്റ്​ ജി. ബാലക്ക്​ തിരുനെല്‍വേലി ജുഡീഷ്യൽ മജിസ്​ട്രേറ്റ്​ കോടതി ഒന്ന്​ ജാമ്യം  അനുവദിച്ചു. അപകീര്‍ത്തിപ്പെടുത്തുന്നതും അശ്ലീലം കലര്‍ന്നതുമായ കലാസൃഷ്​ടി പ്രസിദ്ധീകരിച്ചു എന്നാരോപിച്ച് കലക്​ടർ നൽകിയ പരാതിയിൽ ഐ.ടി ആക്ട് പ്രകാരം കഴിഞ്ഞ ദിവസമാണ്​ ബാലയെ അറസ്​റ്റ്​ ചെയ്തത്. റിമാൻഡ്​​ ​െചയ്യാനായി ​ കോടതിയിൽ ഹാജരാക്കിയപ്പോൾ മജിസ്​ട്രേറ്റ്​ എം. രാമദാസ്​ ജാമ്യം നൽകുകയായിരുന്നു.  

ബ്ലേഡ് മാഫിയയുടെ ഭീഷണിയെ തുടര്‍ന്ന് കലക്ടറേറ്റിന് മുന്നില്‍ രണ്ട്​ കുട്ടികളടക്കം നാലംഗ കുടുംബം  തീകൊളുത്തി ആത്മഹത്യചെയ്ത സംഭവത്തില്‍ അധികാരികള്‍ മൗനം പാലിക്കുന്നതിനെ വിമര്‍ശിച്ചായിരുന്നു കാർട്ടൂൺ.  തീപൊള്ളലേറ്റ് ഒരു കുഞ്ഞ് നിലത്ത് കിടക്കുമ്പോള്‍ നോട്ടുകെട്ടുകള്‍ കൊണ്ട് നാണം മറയ്ക്കുന്ന മുഖ്യമന്ത്രി എടപ്പാടി പളനിസാമിയും കലക്ടർ സന്ദീപ്​ നന്തൂരിയും തിരുനെൽവേലി കമീഷണർ കപിൽ കുമാർ സരത്​കാറും ആണ്​ കാര്‍ട്ടൂണില്‍ വിഷയമായിരുന്നത്.

കുട്ടിയുടെ ജീവന് വിലനല്‍കാതെ പണത്തിനു പുറകെ പോകുന്ന ഉദ്യോഗസ്ഥ അധികാരകേന്ദ്രങ്ങളെ കണക്കറ്റ് വിമര്‍ശിക്കുന്ന ചിത്രീകരണം സമൂഹ മാധ്യമങ്ങളിൽ വൈറലായി. സ്വതന്ത്ര കാർട്ടൂണിസ്​റ്റായ ബാല കാർട്ടൂൺ സമൂഹ മാധ്യമങ്ങളിൽ പോസ്​റ്റ്​ ചെയ്യുകയായിരുന്നു. വര തുടരുമെന്നും അറസ്​റ്റ്​കൊണ്ട്​ വിമർശനങ്ങളെ തടയാനാകി​ല്ലെന്നും  ബാല പ്രതികരിച്ചു.