'എന്നെ ഞാൻ തന്നെ ശിക്ഷിക്കുന്നു'; സ്​റ്റേജിൽ വെച്ച്​ ഏത്തമിട്ട്,​ ബി.ജെ.പിയിലേക്ക്​ പോയ തൃണമൂൽ​ നേതാവ്​

കൊൽക്കത്ത: തൃണമൂൽ കോൺഗ്രസ്​ വിട്ട്​ ബി.ജെ.പിയിൽ ചേർന്ന നേതാവിന്‍റെ ഏത്തമിടൽ വിഡിയോ വൈറലാകുന്നു. ബ്ലോക്​ ലെവൽ ടിഎംസി നേതാവായിരുന്ന സുശാന്ത പാൽ ആണ്​ തൃണമൂലിലായിരുന്നപ്പോൾ ചെയ്​തുകൂട്ടിയ പാപങ്ങൾക്ക്​ സ്വയം ശിക്ഷിക്കാനും മോക്ഷം ലഭിക്കാനുമായി പൊതുപരിപാടിക്കിടെ സ്​റ്റേജിൽ വെച്ച്​ ഏത്തമിട്ടത്​. നേരത്തെ തൃണമൂൽ വിട്ട്​ ബി.ജെ.പിയിലേക്ക്​ ചേക്കേറിയ മുതിർന്ന നേതാവ്​ സുവേന്ദു അധികാരിയുടെ സാന്നിധ്യത്തിലായിരുന്നു സുശാന്ത പാലിന്‍റെ ഏത്തമിടൽ​.

താൻ ബിജെപി പ്രവർത്തകനായിരുന്നുവെന്നും ഇടതുമുന്നണി സർക്കാരിനെ അധികാരത്തിൽ നിന്ന് തുടച്ചുനീക്കാനായി 2005-ൽ ടിഎംസിയിൽ ചേരുകയായിരുന്നുവെന്നും പരിപാടിയിൽ സംസാരിച്ച സുശാന്ത പാൽ പറഞ്ഞു. "എന്നെത്തന്നെ ശിക്ഷിച്ചുകൊണ്ട് എന്‍റെ പാപങ്ങൾക്ക് ഞാൻ ക്ഷമ ചോദിക്കുന്നു," എന്ന്​ പറഞ്ഞ അദ്ദേഹം, സുവേന്തു അധികാരിയും മറ്റ് ബിജെപി നേതാക്കളും വേദിയിലിരിക്കേ ഏത്തമിടാൻ തുടങ്ങുകയായിരുന്നു.