ബി.ജെ.പി നേതാക്കൾക്ക് നാക്കു നിയന്ത്രണം

ന്യൂഡൽഹി: പ്രവാചകനിന്ദക്ക് അന്താരാഷ്ട്ര സമൂഹത്തിന്റെ കടുത്ത വിമർശനം ഏറ്റുവാങ്ങേണ്ടി വന്നതിനെ തുടർന്ന് ചാനൽ ചർച്ചക്കാരായ നേതാക്കൾക്ക് നാക്കു നിയന്ത്രണം ഏർപ്പെടുത്തി ബി.ജെ.പി. ചുമതലപ്പെടുത്തിയിട്ടുള്ള പാർട്ടിവക്താക്കളും പാനൽ അംഗങ്ങളും മാത്രമേ ടി.വി ചർച്ചയിൽ പ​ങ്കെടുക്കാവൂ.

പാർട്ടി മീഡിയ സെൽ അവരെ നിയോഗിക്കും. ഏതെങ്കിലും മതത്തെയോ മത നേതാക്കളെയോ വിമർശിക്കരുത്. ചൂടേറിയ ചർച്ചകൾക്കിടയിൽ ഈ ലക്ഷ്മണ രേഖ ലംഘിക്കരുത്. ഭാഷാ പ്രയോഗത്തിൽ സംയമനം വേണം. പാർട്ടിയുടെ നിലപാടുകളിൽ ഉറച്ചുനിൽക്കണം.

വിഷയം പരിശോധിച്ച് തയാറെടുത്തു മാത്രം ചർച്ചക്ക് പോകണം. സർക്കാറിന്റെ ക്ഷേമപദ്ധതികൾ വിശദീകരിക്കുന്നതിന് ഊന്നൽ നൽകണം. നൂപുർ ശർമയുടെ പരാമർശങ്ങൾ മോദിസർക്കാറി​നെ വെട്ടിലാക്കുകയും ഇന്ത്യയെ നാണം കെടുത്തുകയും ചെയ്തതിനുള്ള മുഖംരക്ഷിക്കൽ നിർദേശങ്ങളാണ് ഇവ.