യു.പി അപകടം: ട്രെയിൻ പോയത്​ അറ്റകുറ്റപ്പണി നടക്കുന്ന ട്രാക്കിലൂടെ

മുസഫർനഗർ (യു.പി): 21 പേരുടെ മരണത്തിനിടയാക്കി മുസഫർനഗറിലെ​ ഖടൗലിയിൽ ശനിയാഴ്​ച വൈകീട്ടുണ്ടായ ട്രെയിൻദുരന്തത്തിന്​ കാരണമായത്​ റെയിൽവേയുടെ അനാസ്​ഥയെന്ന്​ സൂചന. അറ്റകുറ്റപ്പണി നടന്നു​െകാണ്ടിരുന്ന ട്രാക്കിലൂടെ മുന്നറിയിപ്പ്​ ലഭിക്കാത്തതിനാൽ ട്രെയിൻ അതിവേഗം പോയതാണ്​ അപകടത്തിലേക്ക്​ നയിച്ചതെന്നാണ്​ പ്രാഥമിക നിഗമനം.

ട്രാക്കിൽ ജോലികൾ നടക്കുന്നത്​ ലോക്കോ പൈലറ്റും ഖടൗലി സ്​റ്റേഷൻ അധികൃതരും അറിഞ്ഞില്ലെന്നും റിപ്പോർട്ടുകളിൽ പറയുന്നു. അപകടം അട്ടിമറിയല്ലെന്ന്​ സംസ്​ഥാന ആഭ്യന്തരവകുപ്പ്​ പ്രിൻസിപ്പൽ ​സെക്രട്ടറി അരവിന്ദ്​ കുമാർ ശനിയാഴ്​ച രാത്രി തന്നെ വ്യക്​തമാക്കിയിരുന്നു.
ഒഡിഷയിലെ പുരിയിൽനിന്ന്​ ഉത്തരാഖണ്ഡിലെ ഹരിദ്വാറിലേക്ക്​ പോയ ഉത്​കൽ എക്​സ്​പ്രസി​​​െൻറ 23 കോച്ചുകളിൽ 13 എണ്ണമാണ്​ ഖടൗലിയിൽ പാളം തെറ്റി മറിഞ്ഞത്​. സംഭവത്തിൽ 21 പേർ മരിച്ചതായാണ്​ റെയിൽവേയുടെ കണക്ക്​. 97 പേർക്ക്​​ പരിക്കേറ്റിട്ടുണ്ട്​. ഇതിൽ 26 പേരുടെ നില ഗുരുതരമാണ്​. അപകടത്തിൽ 156 പേർക്ക്​ പരിക്കേറ്റതായി യു.പി സർക്കാറി​​​െൻറ ഇൻഫർമേഷൻ വകുപ്പ്​ പ്രിൻസിപ്പൽ സെക്രട്ടറി അവനീഷ്​ കുമാർ അവസ്​തി പറഞ്ഞു. അതിനിടെ, 50 പേരെ ആശുപത്രിയിൽനിന്ന്​ ഡിസ്​ചാർജ്​ ചെയ്​തു.

എസ് ഒന്നുമുതൽ 10 വരെയും തേർഡ്​ എ.സി ബി-1, സെക്കൻഡ്​ എ.സി എ-1, പാൻട്രി കോച്ചുകളുമാണ്​ അപകടത്തിൽ​െപട്ടത്​. ബോഗികൾ തമ്മിലെ കൂട്ടിയിടിയുടെ ആഘാതത്തിൽ ഇതിൽ ആറ്​ കോച്ചുകൾ പൂർണമായി തകർന്നു. മറിഞ്ഞ ബോഗികളിലൊന്ന്​ ട്രാക്കിന്​ സമീപത്തെ വീട്ടിലേക്ക്​ ഇടിച്ചുകയറി. മറ്റ്​ ബോഗികൾ പാഞ്ഞുകയറി ഒരു കോളജിനും നാശനഷ്​ടമുണ്ടായി.

പ്രാഥമിക തെളിവുകളെ അടിസ്​ഥാനപ്പെടുത്തി, എന്താണ്​ അപകടകാരണമെന്ന്​ വൈകീ​േട്ടാടെ വ്യക്​തമാക്കണമെന്ന്​ റെയിൽ​േവ മന്ത്രി സുരേഷ്​ പ്രഭു റെയിൽവേ ബോർഡ്​ ചെയർമാനോട്​ ആവശ്യപ്പെട്ടു. അപകടത്തെപ്പറ്റി ശനിയാഴ്​ചതന്നെ കേന്ദ്രം അന്വേഷണത്തിന്​ ഉത്തരവിടുകയും ചെയ്​തു. ഹൈടെക്​ ക്രെയിനുകളും നിരവധി ജീവനക്കാരെയും നിയോഗിച്ച്​  ഞായറാഴ്​ച ഉച്ചയോടെ, അപകടത്തിൽ​െപട്ട ബോഗികൾ സംഭവസ്​ഥലത്തുനിന്ന്​ നീക്കം ചെയ്​തു. ട്രാക്ക്​ പുനഃസ്​ഥാപിക്കൽ അതിവേഗം പുരോഗമിക്കുകയാണെന്നും അതിനാണ്​ പ്രഥമ പരിഗണനയെന്നും സുരേഷ്​ പ്രഭു അറിയിച്ചു.

ട്രെയിൻ 100 കിലോമീറ്റർ വേഗത്തിലാണ്​ ഒാടിയിരുന്നതെന്ന്​ ഡൽഹി ഡിവിഷൻ ഡി.ആർ.എം ആർ.എൻ. സിങ്​ വാർത്ത ഏജൻസിയോട്​ പറഞ്ഞു. ഡൽഹിയിൽനിന്ന്​ ഏതാണ്ട്​ 100 കിലോമീറ്റർ അകലെയാണ്​​ അപകടസ്​ഥലം.
യു.പി പൊലീസ്​, ആർ.പി.എഫ്​ അടക്കം സുരക്ഷ^സൈനികവിഭാഗങ്ങളാണ്​ രക്ഷാപ്രവർത്തനത്തിന്​ നേതൃത്വം നൽകിയത്​. ശനിയാഴ്​ച രാത്രിയോടെ ബോഗികളിൽ കുടുങ്ങിയ മുഴുവൻ പേരെയും കൂടാതെ മൃതദേഹങ്ങളും പുറത്തെടുത്തിരുന്നു. പരിക്കേറ്റവരെ മുസഫർനഗറിലെയും മീറത്തിലെയും ആശുപത്രികളിലാണ്​ പ്രവേശിപ്പിച്ചത്​. മീറത്തിലേക്ക്​ ഖടൗലി വഴി പോകുന്ന ട്രെയിനുകളിൽ ചിലത്​ റദ്ദാക്കുകയും മറ്റ്​ ചിലവ തിരിച്ചുവിടുകയും ചെയ്​തിരുന്നു. ഞായറാഴ്​ച രാത്രിയോടെ ഗതാഗതം ഭാഗികമായി പുനഃസ്ഥാപിച്ചു.