ത്രിപുരയിൽ കോവിഡ്​ മാനദണ്ഡങ്ങൾ ലംഘിച്ച്​ നടത്തിയ വിവാഹം തടഞ്ഞ ജില്ല മജിസ്​ട്രേറ്റിന്​ സസ്​പെൻഷൻ

അഗർത്തല: കോവിഡ്​ മാനദണ്ഡങ്ങൾ ലംഘിച്ച്​ നടത്തിയ വിവാഹം തടഞ്ഞ ജില്ല മജിസ്​ട്രേറ്റിന്​ പുറത്താക്കി ത്രിപുര സർക്കാർ. ത്രിപുര (വെസ്റ്റ്​) ജില്ല മജിസ്​ട്രേറ്റ്​ ​സായ്​ലേശ്​ കുമാർ ജാദവിനാണ്​ സസ്​പെൻഷൻ.

അഗർത്തലത്തിൽ കോവിഡ്​ മാനദണ്ഡങ്ങൾ പാലിച്ച്​ നടത്തിയ വിവാഹം പാതിവഴിയിൽ ജില്ല മജിസ്​ട്രേറ്റ്​ തടയുന്ന വിഡിയോ പുറത്തുവന്നിരുന്നു. സമൂഹമാധ്യമങ്ങളിൽ വൈറലായതോടെയാണ്​ സസ്​പെൻഷൻ.

സംഭവത്തെക്കുറിച്ച്​ വിശദീകരിക്കാൻ സായ്​ലേശ്​ കുമാർ സമിതിക്ക്​ മുമ്പിൽ ഹാജരായിരുന്നു. മുഖ്യമന്ത്രി ബിപ്ലബ്​ കുമാർ ദേബിന്‍റെ നിർദേശത്തെ തുടർന്ന്​ രണ്ടു മുതിർന്ന ഐ.എ.എസ്​ ഓഫിസർമാരുടെ നേതൃത്വത്തിലായിരുന്നു സമിതി.

ക്രമസമാധനാനം ഉറപ്പാക്കുന്നതും കോവിഡ്​ 19 വ്യാപിക്കുന്നത്​ തടയുകയും ചെയ്യേണ്ടത്​ കടമയാണ്​. വിവാഹം തടഞ്ഞത്​ നല്ല കാര്യത്തിന്​ വേണ്ടിയാണെന്നതിൽ ഉറച്ചുനിൽക്കുന്നതായും സായ്​ലേശ്​ സമിതിക്ക്​ മറുപടി നൽകിയിരുന്നു.

തുടർന്ന്​ ബി.ജെ.പി നേതാക്കളായ ആസിഷ്​ സാഹ, സുശാന്ത ചൗധരി തുടങ്ങിയവർ യാദവിനെ മാറ്റണമെന്നാവശ്യപ്പെട്ട്​ ചീഫ്​ സെക്രട്ടറിക്ക്​ കത്ത്​ നൽകുകയായിരുന്നു.

സമൂഹമാധ്യമങ്ങളിൽ പ്രചരിച്ച വിഡിയോയിൽ വരനോടും വധുവിനോടും ബന്ധുക്കളോടും ഉടൻ തന്നെ വിവാഹവേദിയിൽനിന്ന്​ പുറത്തുപോകണമെന്ന്​ യാദവ്​ പറയുന്നത്​ കേൾക്കാം. കോവിഡ്​ മാനദണ്ഡങ്ങൾ ലംഘിച്ചുവെന്ന്​ ചൂണ്ടിക്കാട്ടി പൊലീസിനോട്​ വേദിയിൽനിന്ന്​ ബന്ധുക്കളെ പുറത്താക്കാൻ നിർദേശിക്കുന്നതും കാണാം. ബന്ധുക്കൾ വിവാഹത്തിന്​ അധികൃതർ നൽകിയ അനുമതി കാണിച്ചുനൽകിയപ്പോൾ യാദവ്​ അവ കീറികളയുന്നതും വിഡിയോയിലുണ്ട്​. ഇത്​ വ്യാപകമായി പ്രചരിച്ചതോടെയാണ്​ നടപടി.

തന്‍റെ നടപടിയിൽ ഏതെങ്കിലും വ്യക്തിക്കോ സംഘത്തിനോ വേദനയുണ്ടെങ്കിൽ ക്ഷമ ചോദിക്കുന്നുവെന്ന്​ അദ്ദേഹം മാധ്യമങ്ങളോട്​ പ്രതികരിച്ചു. ജനങ്ങളുടെ പ്രയോജനത്തിനും ക്ഷേമത്തിനും വേണ്ടി മാത്രമായിരുന്നു അങ്ങശന ചെയ്​തതെന്നും ആരെയും വേദനിപ്പിക്കുകയോ അപമാനിക്കുകയോ ആയിരുന്നില്ല ലക്ഷ്യമെന്നും അദ്ദേഹം കൂട്ടിച്ചേർത്തു.